Ngi la ngiah ki kyrtong ba heh spah bad kiba nabar, ngin jied noh ki kyrtong na la ki Constituency

Da U Cornelius Laloo

Nongpoh, Ïaïong 03: Kawei na ka nuska ba ki paidbah ka Mawhati ki la kwah ban pynduh syndon ïa ka jingpyndonkam ïa ka bor jong ka pisa ha ka por election bad ruh ban wan rah noh ka jingkylla ha ka liang ka roi ka par ka la paw pyrthei hynnin ka sngi ha ka jingïalang jong ka People Democratic Party (PDF) kaba la long ha ka Shnong Mawpat ban pynskhem ïa ki nongnïalam ka PDF Mawhati Zone, ha kaba ki paidbah da ka jingieit ki la ïa synñiang pisa da ka mon sngewbha ban kyrshan ïa u kyrtong ka PDF, u Bah Roswell Shadap uba la rai ban ïa khun ha kane ka election 2023 na ka party PDF na Mawhati Constituency.
Kumba la sahi ha katei ka jingïalang paidbah ba la poi palat 500 ngut ki paidbah ka thaiñ Mawhati ba u State President ka PDF Party bad uba dang dei ruh u Myntri sorkar ka jylla, u Bah Banteidor Lyngdoh u la wan hi da lade ban pynskhem ïa ki nongïalam ka PDF Mawhati Zone, ki paidbah khlem da pynbor da mano mano ruh ki la mih ban synñiang pisa ïa u kyrtong ka PDF, u Bah Roswell Shadap kaba long shi bynta ban kyrshan ïa u ha ka jingïakhun ïa kane ka election MLA na Mawhati na ka party PDF bad kaba ki angnud ruh ban pynduhjaid noh ïa ka jingpyndonkam ïa ka bor jong ka pisa kaba long ka jingshah shet kylla ki paidbah lada ki biej ïa ka bor jong ka pisa tang ha ka por election.
Kum ban pynpaw paidbah, lah ban ong ba kane ka jingdon mynsiem ki paidbah ka Mawhati ban pynduh noh ïa ka jingpyndokam ïa ka bor jong ka pisa ha ka por election kan long ka nuksa kaba bha tam ym tang ïa ki paidbah ka Mawhati Constiteuncy, hynrei kane kan long ruh ka nuksa na ka bynta ki paidbah ka jylla hi baroh kawei ha kaba lada ki dang biej hi ïa ka bor jong ka pisa tang ha ka por election kin nym iohi satia ka jingkylla kiba myntoi ïa ki paidbah ha ka liang ka roi ka par.
La sakhi ruh ha kane ka sngi, kaei kaba la pynlung mynsiem ïa ki nongïalam ka PDF bad ïa u Bah Roswell Shadap kum u kyrtong ka PDF na Mawhati Constituency bad uba la phla paidbah ruh ba um don pisa ban ïa khun election bad u la rai ruh ban mih beit shakhmat ka dei ka jingkylluid mynsiem ki paidbah kiba la noh synñiang ïa pisa katkum ka jingkotbor jong ki, ba ki la kwah ban wan noh ka jingkylla bad ym shuh ban dang shaniah ha ka bor jong ka pisa tang ha ka por election.
Kawei na ka phang ba la ïa kren bad ba la kham ban khia bha ha kane ka jingïalang pynskhem ïa ki nongïalam ka PDF Mawhati Zone, ka dei ka jingpynsngew ba ki la ngiah ki kyrtong heh spah bad ki kyrtong kiba wan ïa khun na shabar ka election, namar ka jingangnud jongki ka long tang ban pynbiej ïa ki paidbah na ka bynta ka jingmyntoi shimet bad ym ba ki sngewkhia ïa ka jingeh ki paidbah ka Constituency.
“Ki kyrtong kiba dei hi ki trai ka Constituency ki tip kham bha ïa ka jingeh ki paidbah hapoh ka Constituency bad ki don ruh ka jingkitkhlieh na ka bynta ki paidbah” ong u Bah Kynmpham Mynsong, u President ba thymmai ka PDF Mawhati Zone hadien ba la shimti kum u President ka PDF ka Mawhati Zone bad bynrap ruh ngi la dep ban mad ha kine ki 4 snem ba la leit noh ba ki paidbah ki shah iehnoh khunswet ha u MLA uba ym dei na ka Constituency bad kaba kham sngewkhia ka long ba wat la u dei u MLA ba la pynjop da ki paidbah bad u dang nut ban leit ïa khun noh na kawei pat ka Constituency ban ieh khunswet ïa ki paidbah ka Constituency khlem da don kano kano ka jingsnggew” u la bynrap.
Ïa kane ka bynta la kren ne pynsngew ruh ym tang u Bah Kynpham Mynsong bad kiwei kiwei ki nongïalam ka PDF kiba la ai jingkren bad wat ki paidbah ruh ki pynmih kajuh ka sur ba ki la ngiah ïa kita ki kyrtong heh spah ne ki kyrtong kiba nabar kiba wan ban pynbiej ïa ki paidbah tang ha ka por election.
“La biang te la biang ïa ki kyrtong heh spah ne ki kyrtong kiba nabara ka Constituency” mih ka sur na ki nongïalam kiba la kren ha kane ka sngi bad ki la kynnoh ruh ba tang shisien phi lah ban pynbiej bad mynta ngi la stad ha kaba ngim donkam ïa ki briew kiba nabar ka Constituency bad dang lah hi ki nongïalam kiba na ka Constituency kiba tip kham bhai a ka jingeh ki paidbah.
Kawei kaba ki la kren bynniaw ruh ka dei ka jinglong jingman ka surok na Umsning sha Umsiang ban mihs ha ka jylla Assam ha kaba haduh mynta ka don ha ka dur ka dark aba sngewsait met bad kaba la bauh jingeh shisha ïa ki paidbah ha ka leit ka wan kaba ki kren khñium bad kren bynñiaw.
Shuh shuh, naduh u Bah Mynsong uba long u President ba thymmai ka PDF Mawhati Zone bad u Bah Roswell Shadap, u kyrtong ka PDF uba la rai rangbah ban mih beit shakhmat ki la ong ba ha ki saw snem ba leit noh ngim iohi satia ka jingkylla hapoh ka Constituency bad ym donkam shuh ban dang kyrshan ïa ki kyrtong kiba thmu ban pynlut da ki klur tang ha ka por election bad haba ki la jop pat ki paidbah kim iohi wat ka dur ka daw jong uta u nongmihkhmat uba ki paidbah ki la pynjop kumba ki la mat ha kane ka kynti ba la dep” ki la bynrap.