Shillong, Nailar 04 : Ka National People’s Party (NPP) ha ka sngi Palei ka la kob ba na baroh ki constituency, ka Shillong East Constituency kadei kaba ki la tikna lypa ba kin jop ha kane ka elekshon MLA kaban long ha u 2023.
“Nga kwah ban pyntikna hangne ba ka Shillong East Constituency kadei ka constituency kaba ka NPP ka tikna lypa 100 persen ba kan jop suk ha u 2023,” ong u Bah Prestone Tynsong, National Vice President ka NPP bad Symbud Myntri Rangbah ka Jylla haba kren ha ka jingïalang pdiang burom ïa u Bah Malcom Tariang ryngkat ka kynhun kiba la wan ban pynïasoh sha ka NPP ha kane ka sngi Palei.
Shuh shuh u la ong ruh ba da ka jingwan jong u Bah Malcom, bad ka jingdon jong ka NPP Block Shillong East ïa ki nongïalam ba thymmai bad kiba la tbit ka la nang pyntikna shuh shuh ba kin jop suk na Shillong East ha ka elekshon ban wan.
Ym tang katta, u Bah Prestone u la ïathuh ruh ba ka party ka don ruh ka jingkyrmen ba na ki 7 tylli ki constituency kiba hap ha Shillong City, ka party ka don ka jingsngewskhem ba kan jop lut baroh hynniew tylli.
U National President ka Party, Conrad K Sangma haba kren ha katei ka jingïalang u la ong ba naduh ka por ba ki dang don ha kawei ka party ki la pyrshang ban khring ïa u Bah Malcom hynrei ki khlem lah satia namar utei u rangbah uba dei ruh u nonghikai u ieng skhem beit ha ka nongrim.
Kumta u la ong ba hadien ka jingïakhun kaba la ïaid mynta 15 snem, khatduh u la pdiang ïa ka jingkhot ban ïatrei lang na ka bynta ban pynkhlaiñ shuh shuh ïa ka party ym tang ha katei ka constituency hynrei wat sha ki constituency kiba don markhap ruh kumjuh.
Ha kane ka sngi la ioh ruh ïa ka jingkren na u Bah Fantin Joseph Lakadong, MDC ka NPP na Laitumkhrah, Dr.Jasmine kyrtong ka NPP na Nongthymmai, Bah Mayborn Rapthap President NPYF Shillong City nalor kiwei kiwei.
Na ka liang u National Vice President ha kane ka sngi u la pynskhem ruh ïa ka Shillong East NPP Block.
