Shillong, Rymphang 20: Ka seng Communist Party of India (CPI), Meghalaya State Council, ka pynpaw ïa ka jingsngewsih kaba khraw halor ka jingkhlad kyndit jong u MP ba donburom ka Shillong Parliamentary Constituency, u Dr. Ricky Andrew J Syngkon ha ka sngi Palei.
Lyngba ka kyrwoh ba la phah da u Secretary u Bah R Thabah ka CPI ka la ong ba baroh kawei ka jylla Meghalaya ka sngewsih bad ïam pangnud halor kane ka jingduh kaba khraw naba u la dei u wei napdeng jong baroh ki nongshong shnong.
Ka jingkhlad noh jong u, ka la ieh ïa ka jylla ha ka jinglong kaba kyndit bad kaba sngewsih. “U Dr Ricky um dei tang u nongïalam uba don ka jinglong kaba kyrpang hynrei u la dei ruh u briew uba don ka jingngeit, uba bat ïa la ka nongrim bad uba ïaid shakhmat ban shim ïa ka jingkitkhlieh da ka jingshida bad ka jinglen lade. Ka jingsngewlem jong ka seng ka leit sha ka ïing ka sem, kiba ieid ba thoiñ bad baroh kiba pynpaw ka jingsngewsih halor kane ka jingduh kaba khraw. Aiba ka mynsiem jong kan ïoh ka jingjah thait ka bym jukut,” ong u Bah Thabah.
