Ngi la don ka jingïadom hynrei nga ïaroh ïa ki nonghikai kum ki nongtei ïa ka lawei: Lahkmen

Shillong, Nailur 05 : Wat ki la don ki khep ba ka la poi shaduh u pud jong ka jingïaleh dom, ïaleh at, ïaleh phoi bad ka sorkar namar ki nonghikai ki hap ban ïakhih ban ïoh ïa ki jingsiew jongki, hynrei ha kum kane ka sngi ba kyrpang bad rakhe ïa ka Sngi Burom ïa ki nonghikai u Myntri ka tnad pule puthi u bah Lahkmen Rymbui ula ai ka jingïaroh bad sngew burom ïa ki nonghikai namar ma ki ki dei ki nongtei bad nongpynlong ïa ka lawei ba phyrnai jong ki khynnah skul bad jong ka jylla hi baroh kawei.
Mynta ka Sngi ka sorkar jylla ka la pynlong ïa ka jingrakhe ïa ka sngi kyrpang ki nonghikai bad ka jingpynkup burom da ki khusnam ïa ki katto katne kiba la shah jied ban ïoh halor u synñang u bynhei uba ki la noh lyngba ka kam hikai skul ïa kaba la pynlong ha U Soso Tham Auditorium. U Bah Lahkmen u Myntri ka tnad pule puthi u la wan shim bynta kum u kongsan ha ryngkat ka jingdon kiwei pat ki heh ophisar naduh u Commissionner and Seceretary bad u Director ka tnad pule puthi.
Haba kren ha kane ka sngi u Bah Lahkmen u la ai ka jingïaroh kaba khraw ïa u synnïang u bynhei uba ki nonghikai ki la noh sha ka imlang sahlang khlem kheiñ ïa ki raieh raidam kaba ki hap ban ïaid lyngba. U la ong ba kaei kaba ki nonghikai ki la leh na bynta ki khynnah skul khamtam eh ha ka por ba ka khlam Covid-19 ka dang jur kam dei ka kam kaba suk ha kaba na ki kamra kaba ki hikai da ki bun bun snem kin hap ai jinghikai noh syndet syndet lyngba ki Mobile phone.
U Bah Lahkmen u la ong ruh ba ka kam hikai ka dei ka kam kaba eh namar ki dei ma ki kiban thaw dur ïa ka lawei ki khynnah skul bad ka jylla. U la ong ruh ba ka kam hikai ym lah ban len ba kiba bun ki jingeh kin hap ban mad, ka jingrit ka jingsiew, ka jingslem ka tulop bad kiwei kiwei bad u la ong ba na ka liang ka sorkar hi kan leh ïa kaba bha tam na bynta ki nonghikai ha kaba ïadei ban weng ïa ka jingeh jong ki.
Haba kren halor ka jingbun ki kyrdan ki nonghikai ha ka skul u Bah Lahkmen u la ong ba ka long kaba eh haduh katta katta ïa ka sorkar ban pynrung lang noh ha kawei ka kyrdan bad u la ïathuh ba na ka liang ka tnad hi kan pyrshang na bynta ka bit ka biang ki nonghikai. U la ïathuh ba na ka liang jong u kum u Myntri u la pyrshang ban leh ïa kaba bha ryngkat ryngkat ka jingïatreilang bad kiwei ki tnad ba donkti lang ban pyntyllun ïa ka tnad pule puthi kaba kynthup naduh ka tnad Planning bad ka tnad pla tyngka.
“Kum ki nonghikai phin hap ruh ban thep ha ka jingmut ki khynnah skul ïa ka rukom pyrkhat kaba thymmai ym ban sah beit ha ka ukom pyrkhat ba ka jingleit skul ka dei beit tang ban ioh kam sorkar. Ngi sakhi mynta ba ka lad kamai ka don ruh wat ha ki rynsan social media kaba lah wat ban pynim ja ruh bad kum kine keiñ ki buit thymmai kaba donkam ba ngin hikai ïa ki khynnah skul.” u la ong.
Haba kren halor ka jingïakynduh jong u kum u Myntri ka tnad u Bah Lahkmen u la ong ba ki la don bun ki khep kaba ka don ka jingïadom bad ka jingïania bad ki nonghikai hynrei kine kim dei ba ki ïa dom shimet hynrei tang ha ka kam u la ong.
Ha kane ka sngi la ai ruh ka khusnam sha ki 13 ngut ki nonghikai kum ka jingithuh ïa u synïang uba ki la noh sha ka imlang sahlang ba kyntup ïa ka Lasubon Shullai, u Dibiland Iawphniaw, ka Sidamon Kurbah,ka Bioles Lyngdoh,u Dipak Kumar Saha, u Arun Kumar, u T P Tmung, u Jeremias Kharbani, u Dominic Marak, u Jairaj Chetry, ka Hezillina T Sangma, Smti. Dewbarlinda B Sangma, u Lindstorm K Marak, Headmaster, Rugapara Deficit Secondary.