Ngi kyrmen ban jop pyrshah ïa ka Sorkar halor ka mokotduma ba ka ujor ïa ka rai ka HC: Brightstarwell

Shillong, Jylliew 15: U MLA jong ka Mawlai Constituency uba dei ruh u nonghikai ka St Anthony’s College u Bah Brightstarwell Marbaniang ha ka sngi Balang haba kren ha ka jingïalang pynrung dkhot ka VPP ha Sohïong u la pynpaw ïa ka jingsngew skhem ba ma u ryngkat bad ka kynhun ki para nonghikai kin jop biang ha ka mokotduma ba ka sorkar ka la ujor ha High Court (HC) of Meghalaya pyrshah ïa ka rai ka HC kaba pynksan ïa ki nonghikai kolej ba ki lah ban shim bynta ha saiñhima khlem donkam ban ieh ïa ka kam.
“Kumba phi tip ba ka Ïing Bishar jong ka Meghalaya High Court ka la pyndam noh ïa ka hukum ba la pynmih da ka sorkar jylla ha ka 23 tarik Lber 2021 bad kumjuh ki kyndon ka Meghalaya State Education Policy 2018 kaba khang ïa ki nonghikai kolej kiba hikai ha ki Aided Institution ne ki kolej kiba ïoh jingïarap na ka sorkar ba kin ïakhun ïa ka ilekshon ne ban shim bynta ne kitkam ha ki seng saiñ pyrthei, ha ka ka rai bishar bad ka jingpynmih ïa ka hukum da u Justice HS Thangkhiew halor ka jingujor jong ngi ki nonghikai kolej pyrshah ïa katei ka rai ka sorkar jylla bad ngi la jop ruh ha kane ka moktduma pyrshah ka sorkar jylla,” u la ong.
“Wat hadien ba ka kashari ka la pynksan ïa ngi hynrei ka sorkar jylla ka la ai da ka mokoduma kaba thymmai ha High Court ban pyndam ïa katei ka rai bishar jong ka kasshari u nongbishar ba tang marwei bad kumba longf mynta ïa kane ka mokotduma la bishar da ka kashari ki arngut ki nongbishar, bad ngi kyrmen ba ha kane ka kynti kaba mynta ruh ngin jop biang pyrshah ïa ka sorkar,” u la ong.
U la ïathuh ruh ba ha ka por ba ka sorkar ka pynmih ïa kane ka hukum u la rai rangbah ban ïaid beit sha khmat ban ïakhun ïa ka elekshon bad ruh ban ïakhun pyrshah ïa kane ka hukum ka sorkar.
Haba kren halor ka rai jong u ban pynïasoh sha ka saiñ pyrthei lyngba ka VPP u la ong, “Jin lada nga pyrkhat tang ïalade shimet ngam donkam ban pynïasoh sha ka saiñ pyrthei namar nga la biang ka kam ka jam hynrei dei namar ngam hun ban shu shong kli kti ban peit kai ïa ka synshar khadar kaba la sniew dur bad i duh jingkyrmen ïa ka lawei ki khun ki kti bad ki pateng ban dang wan”.
“Nga jied ïa ka VPP namar ki nongrim kiba skhem ka party kata ban wanrah ïa ka synshar khadar kaba khuid bad ban pynskhem ïa ka hok longtrai man trai jong ngi ki trai muluk,” u la bynrap.
Na ka liang u Bah Bright u la khot la wer lang ïa ki paidbah nongshong shnong ban snoh kti lang ha kane ka jingïakhun ba la lam khamt da ka VPP ban ai ïa ka lawei kaba shngañ ïa ka jylla.