‘Ngi kyrmen ba kin ym dei tang ki nia Election’: FKJGP Rambrai

Rambrai, Naitung, 31: Ka Federation of Khasi Jaiñtia & Garo People Rambrai Circle ha ka sngi saitjaiñ, ka la ïoh ban aiti ïa ki mat jingdonkam jong ka thaiñ Rambrai, bad ki la pynsngew ha I Bah Prestone Tynsong Dy CM ha ka jinghiar jong u ha Rambrai.
Ka seng ka la buh ïa ki mat jingdawa ba ban plie noh ïa ka Rambrai C&RD Block, ban buh noh ka College ha Rambrai, ban kyntiew kyrdan ïa ka Rambrai PHC sha ka CHC, ban buh noh ïa ka Police Out post ha Rambrai, ban pynkloi ban khot Tender ïa ka surok 2 lane 2nd Phase na Mawthir-Kyrshai-Chaigoan bad ba dei ban siew noh ïa ka bai khyndew.
Ka seng ka la dawa ban siang rong noh ïa ka surok Rambrai-Mawlangsu-Phudumbah lyngba ka Mawthungmarwei, kaba la sahteng 27 snem ba la trei naduh u snem 1995-96 kumba 11 km tam. Nangta ban ithuh noh ïa u Diengkseh kum u wei na ki mar rep, ban wanrah noh ïa ka sub division PWD Road sha Rambrai.
Ka seng ka pynpaw ba dei ban plie thymmai ïa ka surok na Rambrai-Mawkhiat-sha Mawsikar-Langpih, ban pynheh ïa ka surok iew Rambrai na lad Mawrangiew Rambrai-sha Nongbah Rambrai bad ban pyndep siang rong ïa ki surok ba la dep pyntrei ha ki snem ba la dep ka jingïaseng Synod ha ka thaiñ Mawlieh, Nongkroh-Rambrai.
Ka seng ha ka jingïalam u samla Jistarland Lyngkhoi ryngkat ki nongïalam bad ki dkhot jong ka FKJGP Rambrai circle, ka la ïoh ban aiti ïa kitei ki mat jingdawa ha ki kti u Bah Prestone. Ka seng ka kyrmen ba lyngba ka jingwan iuh kjat kaba ar sien jong u Dy CM ha Rambrai, ba ka sorkar MDA kan pynurlong ïa kitei ki mat jingdawa jong ki paitbah ka thaiñ Rambrai.
U Bah Prestone Tynsong u la kular ba shen yn sa plie ïa ka C&RD block ha Rambrai bad kawei ha Nonglang. Kumta ka seng ka kyrmen ba kin ym long tang ki nia Election ban pynbiej ïa ki paidbah bad ki paidbah ki khmih lynti ba kin urlong shisha.