Shillong, Nailar 16 : Ka Sorkar MDA hapoh ka jingïalam ka NPP ka kyrmen skhem ba ka jingkren ïasuk bad ka seng HNLC kan kut noh kloi namar ka seng ka khlem buh kino kino ki kyndon bad ka jingïakren kan long beit hapoh u pud u sam jongka Riti Synshar ka Ri.
Haba kren kum u kongsan ha ka jingrakhe ïa ka lyngkhuh snem ba 76 jongka Jinglaitluid ka ri India ha madan Polo u Myntri Rangbah ka jylla u Conrad K Sangma u la pynpaw ba ka shongsuk shongsaiñ ka la wan phai ha ka jylla hynrei wat la katta ruh kam mut ba ka sorkar kan shong thiah thai noh hynrei kan dang ïai trei ban pynneh pynsah ïa kane ka jingshongsuk junom. Na kata ka daw ka la rai dang shen ban dang pynbiang nadong shadong ïaki jingdonkam jong ki bor pulit naduh ki tiar ki tiar, ki ophis treikam bad ter ter.
U la pynpaw ruh ba ka jingai jongka seng HNLC da ka jingthoh ba ka jingkren ïasuk ka long khlem kino kino ki kyndon bad kan long hapoh u pud u sam ka Riti Synshar ka Ri ka long kawei na ki kam kiba pynpaw ba ka seng ka kwah da shisha ban wan sha ka miej jingïakren ban ïa im ryngkat bad ka imlang sahlang bad kane ka la dei kaei kaei ka ban sah jingkynmaw ha ka histori jongka jylla.
“ Ka jingïakren ïasuk ka la sdang bad ka sorkar ka kwah ba ka jingïakren kan kut kloi noh” ong u Myntri Rangbah. U ai khublei ïa ka sorkar pdeng kaba kloi ban pdiang ruh ïa kane ka jingtyrwa ka seng HNLC.
Ha ka jingkren u la pynpaw ruh ïa ka jingshim khia jongka sorkar ban ïapynbeit noh ïa u pud u sam bad ka Assam, u la ong ïa ki hynriew tylli ki jaka ba ïakajia la dep ïa kren bad ïa pynbeit kaba sah ka long sa ïa ki hynriew tylli kiwei pat bad ïa kine ruh ka jingïapynbeit ka la ïaid ban sdang noh ïa ka Wat kaba ar. ïa ka soskular pynbeit pud la ïasoi ha Delhi hakhmat u Myntri Kam Pohïing u Amit Shah ban pynbeit shwa ha ki hynriew jaka kata ha Tarabari, Gizang, Hahim, Boklapara, Khanapara-Pillangkata bad Ratacherra.
