Ngi kwah ban wanrah ïa ka roi ka par ym tang ha ka Constituency hynrei ha ka jylla baroh kawei : Dy CM

Shillong, Rymphang 15 : U President jongka NPP ha kane ka jylla uba long ruh u Symbud Myntri Rangbah u bah Prestone Tynsong u la ong ba ka sorkar ka kwah ban wanrah ïa ka roi ka par ym tang ha ki constituency hynrei ha ka jylla hi baroh kawei. ïa kane u la kren ha ka rynsan ïalap election ha Laitkroh mynta ka sngi Saitjain da kaba kyntu ruh ïa ki paidbah ban jied bad pynjop don burom ïa u pyrsa jongu uba dei u kyrtong ka NPP na ka Langkyrdem -Laitkroh Constituency.
Haba kren ha kane ka jingïalang u la kular ruh ïa ki paidbah ba ka sorkar kan sa pynbeit noh ïa ki jingeh ha kaba ïadei bad ka jingkhang tih maw bad shyiap. “ Ym lah ban len ka jingkhang ban tih maw bad shyiap ka la ktah jur ïa ka jakpoh jong kiba bun ba lang. Kumta nga kyrpad ïa phi ban ïai ap shipor arpor bad sngewbha ruh shaniah ha nga kumba nga la ju long ruh u MLA jongphi shwa ban phiah ïa ka constituency bad kumjuh ruh shaniah ha ka NPP kaba ïalam ïa ka sorkar namar ngin sa pynurlong ïa ka jingthrang jongphi khnang ba ngin im ja ym ban iap thngan. Nga kular ïa phi ki paid jong kane ka constituency ba ngin leh ei ei halor kane”.
U la ong ruh “ Hadien ka 24 tarik u Rymphang ym dei ba phin ïoh tang u MDC hynrei phin ïoh ruh ïa u Prestone kum u kpa jongphi. Ngan ïai bteng ban ïadon ryngkat bad phi bad nga kyrpad ïa phi ba phin ailad ïa u pyrsa jong nga ban pun jingkieng hapdeng ka elaka bad ka ïing ka sem bad ka ophis jongnga ha Secretariat”
Ha kaba ïadei bad ka jingshah khang pynïadur masi dang shen u la ong “ Ha ka jingshisha ym don jingïadur masi hynrei don ki seng kiba nabar kiba shondur bad phah ïa kata ka dur ba pynïadur masi sha Delhi bad na Delhi ki phah shithi sha ka sorkar jylla ban ai kaiphod halor kitei ki dur. Ngan sa ïamir jingmut ïa kane bad ki nongïalam mynta ka sngi bad nga kyntu ba phin dei ban sngewei ei halor kane namar ïa kane ruh ngan shim khia ban pynbeit ïa ka kam”.
“Nga kyntu ïa ki paidbah ba kim dei ban shah ïalam bakla ha ki riew shim kabu kiba pnah thylliej ban kren bad pynbiej tang ha surok bad ngam kwah kren bun ktien halor kane hynrei nga kyrpad ïa phi ban shaniah ha u bah Prestone” ong u President ka NPP.
Ha ka jingkren ïalap election ha Saitsohpen ha ka miet Sngi Thohdieng une u khlieh duh jong ka NPP ha kane ka jylla u la ong “ Ngi la ïa kynduh bad ki nongïalam shnong la saw sien lynter hapoh ka jingïalam jong u Sordar. Ngi la tip ïa ki jingeh jongphi hynrei sngewsih ba ngim pat lah ban shim ïa ka rai kaba khatduh halor kane ka kam. Ngam shym la wan hangne ban pynbiej ïa phi hynrei ngin hap ban ïakynduh biang sa shisien shwa ba ngin shim ïa ka rai ba khatduh. Kane kam dei ka rynsan ba ngn ïa thuh ïaphi ban kynmaw ïa ngi ïa ki kam ba bha ba ngi la leh namar ngim donkam ban ong ei ei hynrei ka jingshisha ka long kane ka jingeh ka la sahteng la bun bun snem ym don ba shim khia ban pynbeit ïa kane ka kam hynrei dei tang kane ka sorkar ba lam khmat da ka NPP kaba lah ban pynbeit ïa kane ka kam ka ban ïaineh junom”.
Haba ai nuksa ïa kajuh kaba la jia ha Williamnagar ha kaba ïadei ba ka khyndew sorkar u bah Prestone u la ong “ Ha u snem ba la dep ka Kynhun Myntri jong ngi ka la wanrah ïa kane ka mat jingiakren kumno ban pynbeit ïa kane ka kam ha kaba ïadei ba kane ka khyndew sorkar. Ka dei ka juh ka jingïakynduh kumba ïa kynduh ha Williamnagar bad Saitsohpen namar ba ngim kwah ban don kano kano ka jingbym ïasngewthuh jingmut bad ba ki briew ka Williamnagar kin mad ïa ki jingeh, ngim kwah ban ïakajia majia ruh, lane ban bun ki briew kiba kam trai ïa ka jaka ruh, kumta da ka jingïasngewthuh jingmut lang ngi la ïa pynbeit ïa kane ka kam bad ki briew ka Williamnagar bad mynta ki la ong ba dei tang ka NPP kaba ïalam ïa ka sorkar kaba ngi la ïoh pdiang ka jngkyrkhu. Kumta nga kular ïaphi hadien kane ka election MDC, ngan khot biang ïa ka jingïalang halor kane ka kam bad hadien kane yn sa rah hakhmat ka Kynhun Myntri bad kumta long kiba la pynkhreh ban ïoh pdiang ïa ki jingkyrkhu” ong u khlieh ka NPP.
U la kyntu ïa ki paid Nong Sohra ban ai ka jingkyrshan ba pura ïa ka NPP da kaba pynjop don burom ïa u kyrtong ka party u bah Donnevan Wahlang khnang ba ka constituency kan roi kan par. U la ïathuh ruh shen yn sa sdang ïa ki projek ba thymmai ki ban wanrah ka jngmyntoi ïa ki paid nongshong shnong ka Saitsohpen bad ka Sohra hi baroh kawei.