Ngi kwah ban ai jingïarap ha Nongstoiñ hynrei la khang noh ïa ngi: Kyrmen Shylla

Nongstoiñ, Jylliew, 30: Ha ka jingïalang paidbah ïa kaba la pynlong mynta ka sngi ha Bishop Hall New Nongstoiñ da ka seng United Democratic Party, kaba dei ruh ka sngi ban pynskhem ïa ki nongkitkam ba thymmai jong ka UDP Youth Wing West Khasi Hills District, u bah Kyrmen Shylla myntri sorkar ka jylla Meghalaya, u la ong ba haba khmih ïa ka Nongstoiñ la isynei shisha bad u kwah eh ban ai jingïarap. Hynrei yn leh kumno namar la khanglad noh da u myntri rangbah ka jylla Meghalaya.
Ha katei ka sngi pynskhem ïa kitei ki nongkitkam jong ki samla na ka liang jong utei u myntri u ba bad ruh kum u President ki samla UDP sengkmie, um shym la ai jingkren ei ei hynrei tang khyndiat kynsoit ki kyntien kitbok kit rwiang, kyrkhu kyrdoh namar kiwei pat kiba la ai jingkren kham ha shuwa ki la dep kren lut. Hynrei, utei u myntri u la ong pat ba ka seng jong UDP ka ai tiket tang ïa kita ki briew kiba don ka bor bad kiba I tikna ban jop.
Katba na ka liang u Bah Pius Marweiñ u la ong ba ka Congress ka la kylla Zero bad ïa ka NPP ruh ki paidbah ki la ngiah. U MLA ka Ranikor konstitwensi haba ai jingkren, u la kynthoh tyngeh ïa ki ar tylli ki seng heh kynthup ïa ka seng Congress bad ka NPP, ha kaba u la ong ba ki paidbah jong ka jylla Meghalaya mynta ka kynti ki la ngiah lut ïa kine ki seng National Party, namar ki la ïohi ïa ka jingsniew jong ki haba ïadei bad ka synshar khaddar lyngba ki kam kiba la paw tyngkreiñ.
U la ong ba ki paidbah ki khmih dngong pat sa ïa ka seng UDP, da ka jingangnud bad ngeit ba dei tang kane hi ka seng, ka ban sa lah ban lamkhmat ïa ka jylla ha ki por ki ban sa wan, namar wat ki paralok Garo ruh ki la shaniah bha ïa ka seng UDP. U la ong ruh ba shibun ki sitting MLA bad ki sitting MDC ki ban sa pynïasoh bad kane ka seng, hynrei ïa mynta um pat lah ban ïathuh dei mano. U la kop ruh da kaba ong ba ha Nongstoiñ, Rambrai bad ka Mawshynrut, ka UDP ka don ïa ka jingkyrmen ba ban ïoh ban kheit ïa u soh u ba thiang ha ka elekshon ban wan.
Na ka liang u bah Kyrmen Shylla President UDP Youth Wing seng kmie u la pynskhem bad kyrkhu kyrdoh ïa ki nongkitkam ba thymmai jong katei ka tnad ki samla na ka bynta ka samoi treikam 2022 haduh 2025. Ki nongkitkam kiba thymmai ki kynthup ïa u samla Moslandar Marngar President, samla Wanphailang Dkhar Working President, samla Shootingstar Nongsiej General Secretary, u samla Rinaldi Kharbani kum u Chief Youth Organiser u ba dei ruh uwei na ki nongshna phlim ba pawnam bha jong ka thaiñ, bad kiwei kiwei ki Nongsehsorni jong ka seng.
Kiwei pat kiba la sakhi lang ïa kane ka sngi ki long u bah Equator Nongrang MDC barim ka Mairang, bah Balajied Synrem MLA ka Shylla bad kiwei kiwei ki riew rangbah bad longkmie.