Ngi kam ba ngi dei ka jylla Khristan, hynrei ki kam bamsap pat kiba isaitmet: Adelbert

Shillong, Naitung 24: U MLA jong ka North Shillong Constituency ha ka sngi u Blei jong ka 24 tarik u la pynpaw ïa ka jingsngew bynñiaw halor ka jingjyllei ka bamsap ha ka jylla bad ka jingim arsap ki nongïalam kiba ngi la jied ban mih khmat sha ka Ïing Dorbar namar ka kam bad ka ktien kaba ki kren kam ïahap wat tang khyndiat ruh.
Haba kren kum u nongshah khot sngewbha ha ka jingïaseng pynkyntang ïa ka kamram pynlong jingïaseng bad jingduwai(Chapel) ha Capacity Buliding Centre jong ka Ri Bhoi Presbyterian Synod kaba don ha Mission Compound, Shillong u Bah Adelbert u la ong ba “Nga sngew lehraiñ ban kam kum ka jylla ba bun khristan namar lada ngi peit katno ka jingjyllei ka bamsap bam pong bad ka jingtuh im im peit peit ïa ka lawei jong ki khun samla. Kumno kum ki nongïalam kiba kam ba ki dei ki Khristan kim don ka jingsngew lehraiñ ban kren kum kiba ngeit eh ha ka jinghikai Khristan bad ki leh pat markhongpong”
U Bah Adelbert u la khot ruh ïa ki riewngeit baroh ba kin duwai sha u Blei ba un sei ïa ki nongïalam kiba kynsai kiba lah ban trei na bynta ka jingbha ka ri bad ka jylla hi baroh kawei.
“Ngi ju ïohsngew sharum shaneng ïa kata ka jingkren shaphang ka jingkylla niam(conversion) hynrei nga kwah ban khot hangne to ngin kylla na u Khristan sha u Khristan uba im kham bha na kaba ngi ju im, u Hindu sha u Hindu uba kham janai bad kumta ter ter”, ong u Bah Adelbert.
“Kum ki briew to ngin lah ruh ban pynïapher kaei ka jingdonkam bad kaei ka jingkwah. Lada ngi kthong tang ïa ka jingkwah bad ngi klet ïa kaei pat kaba donkam kaba nga sngew sheptieng ïoh ngin jah kwah”, u la bynrap shuh shuh.
Haba kren halor ka jingmang jong u ban shna ïa kane ka kamra jingïaseng bad jingduwai u Bah Adelbert u la ong ba dei namar ki paidbah ka North Shillong naduh ka sien kaba nyngkong eh ki jied ïa u ym tang ba un peit ïa ka jingeh tang kiba na Constituency lajong hynrei na bynta ka jaidbynriew ruh. U la ong ruh ba da ka jingïoh ka Synod Ri Bhoi ïa kane ka kamra ban ïalum lang ban pynlong ïa ka jingïaseng bad jingduwai kan long ka jingsngew kmen na bynta jong u kum u MLA ka North Shillong.
Ïa kane ka jingpynkyntang la ialam da u Pastor H. L Myrsing Moderator ka Ri Bhoi Presbyterian, ha ka jingiadon lang kiwei pat ki pastor, ki tymmen Basan, ki nongialam balang bad ki paid riewngeit jong ka Balang Presbyterian Ribhoi kiba shong ba sah ha Shillong.