Ngi im ha ka juk kaba ngim lah shuh ban ïai ap, ka khubor u Fr. Teibor Lyngdoh sha ki Longkmie

Nongpoh, Nohprah 05: Haba sam ïa ka ktien ka jong u Blei bad ban pyndep ïa ka niam ka rukom ha ka Mass Bakhuid jong ka Dorbar Pyllun ba Hynriew ka Synjuk ki Kynthei Katholik, Shillong Archdiocese hyin ka sngi U Blei ha Nongpoh Parish, u Fr. Teibor Lyngdoh, uba dei u Procurator and Administrator ka Shillong Archdiocese u la ban khia da kaba ong, “Ngi la im ha kata ka juk ne ki sngi kiba ngim lah shuh ban ïai ap’
Da kaba kren ïa kitei kyntien ka jingthmu ka long ba kane ka dei ka aiom advent kaba ngi ap khmih lynti ïa ka jingwan longbriew u Khun Blei sha kane ka pyrthei, bad na ka liang u Fr. Teibor Lyngdoh u la ban khia pat sha ki Longkmie Katholik ba ngi dei ban long kita ki Longkmie kiba lah ban ïai ap la ka long ha ka jingim ba kynja mynsiem ne ha ka jingim ba kynja pyrthei.
Kane ka long ka khubor kaba u Fr. Teibor u la sam sha ki Longkmie ha kane ka Dorbar Pyllun jong ka Synjuk ki Longkmie Katholik, Shillong Archdiocese kaba la pynkut noh mynta ka sngi ha Nongpoh Parish bad ba la wan ban shim bynta ruh da ki hajar ngut ki Longkme na kylleng ki Parish ba hap ha ka Shillong Archdiocese.
Haba sam ïa ka ktien ka jong u Blei kum u nongpyndep ïa ka niam ka rukom, u Fr. Teibor Lyngdoh u la sot ruh shibun ki nuksa kum ka Kynthei kaba armet ka hap ban ap haduh 9 bnai ban kha ïa I khun, ki nongrep ki hap ban ap haduh ban da long ban ot, ki khynnah skul ki hap ban ap haduh ban da ioh risot bad haba ïai ap ka don ka jingshemptieng, ka jinglynga bad ka jingthaid bad kaei kaba u Fr. Teibor Lyngdoh u kwah ban ai ka khubor sha ki Longkmie ka long ba lada ngi ap ïa kano kano ka kam ngi dei ban ap da ka jingieit bad ka jingkmen.
U la ong ruh kane ka dei ka advent kaba ngi ap khmih lynti haduh ban da poi ka jingwan longbriew u khun u Blei sha kane ka pyrthei kaba dei ka Christmas bad haba ngi ap khmih lynti ngim dei ban long kita kiba sngewthaid, sngewsheptieng bad sngewlynga, hynrei ngi dei ban ap da ka jingkmen.
“Haba ngi ïaid ap da ka jingieit bad ka jingkmen kane kan ïarap ïangi ban long kita kiba ïaineh bad kiba ngi lah ban trei kham bha la ka long ha kano kano ka bynta jong ka kam kaba ngi trei” ong u Fr. Teibor Lyngdoh.
Kaei ka symboh pyrkhat kaba u Fr. Teibor Lyngdoh u kwah ban sam sha ki Longkmie da kaba ong ïa kitei ki kyntien ba ngi la im ha ka juk kaba ngim lah shuh ban ïai ap, ka dei namar ba bunsien ngim lah shuh ban ïaid ap na ka daw ba ngi thaid, ngi sheptieng bad ngi lynga, hynrei haba ngi ap da ka jingieit bad ka jingkmen kamut ba ka jingkmen ka dei ban synshar ha ki longïing longsem, ha ka Balang bad kumjuh ruh ha ka imlang ka sahlang, la bynrap u Fr. Teibor Lyngdoh.
Lyngba jong kane ka Dorbar Pyllun ki Longkmie Katholik, Shillong Archdiocese kaba la sdang naduh ka sngi Saitjaiñ bad bad ba al pynkut noh mynta ka sngi, ki Longkmie Katholik ki la ioh lum ruh shibun ki symboh pyrkhat kum ki Longkmie da ki nongkren bapher bapher bad ki la shim bynta ruh ha ki prokram bapher bapher.
Ha ka Mass Bakhuid kaba long mynta ka sngi nalor u Fr. Teibor Lyngdoh uba la pyndep ïa ka niam ka rukom la shim bynta lang ruh naduh u Fr. Peter Syiemlieh, Parish Priest ka Nongpoh, kiwei kiwei ki phadar bad ki sister ba la ai mynsiem lang ruh ha kane ka sngi da ka jinglang u MLA ka Nongpoh, u Bah Mayral Born Syiem, ka MDC ka Umsning, ka Kong Macdalyne Mawlong, ka Kong Marian Maring, u Bah Sunshine Makri bad kynthup kiwie kiwei ki riewrangbah kiba la ai mynsiem ha kane ka Durbar Pyllung ki Longkmie ka Synjuk ki Longkmie Katholik, Shillong Archdiocese.
La pynkut ruh ïa kane ka Dorbar pyllung da ki jingsam ïa ki khusnam bapher bapher sha ki Longkmie bad ki nongkyrshan ïa ki Longkmie bad bud da ka jingmane Sacrament bad pynhap ïa ka lama ban pynkut noh ïa akne ka Durbar jong ki Longkmie Katholik, Shillong Archdiocese.