Ngi ïatreilang bad ka NDA tangba ngin ym leh pyrshah ïa ka mon ki paidbah: Conrad Sangma

Shillong, Nailar, 09: U Myntri Rangbah ka Jylla u Conrad K. Sangma ha ka sngi Balang u la ïathuh ba u la kren da kaba shai ha ki nongïalam jong ka National Democratic Alliance (NDA) ba un ym lah satia ban leh ïa kino kino ki kam kiba long pyrshah ïa ka mon jong ki paidbah ka thaiñ Shatei Lammihngi.
“Nga kren ïa kane naduh mynsiem jong nga bad nga kwah ban ïathuh ïa phi ngi ïatreilang ha ka sorkar synrop bad ka NDA. Hynrei nga la ong ïa ki nongïalam ka NDA ba kane ka dei tang ka kynhun synrop saiñpyrthei bad ngin ïatreilang kum ka kynhun bad lada phi ong ïa nga ban leh ïa kino kino ki kam kiba long pyrshah ïa ka mon jong u paidbah ngan ym leh satia daleilei ruhem,” ong u Sangma uba long ruh u National President jong ka NPP haba kren ha ka jingrakhe ïa ka International Day of the World’s Indigenous Peoples ba la pynlong da ka North East Indigenous Peoples’ Forum (NEIPF) Meghalaya State Chapter.
U la bynrap, “ngan ym lah ban ïapeiñ halor ki paidbah ïa kiba nga don hangne ban trei na ka bynta jong ki, ki paidbah ki la ai ïa ka jingieid bad ka jingshahniah ha nga.”
Da kaba kular ban ïakhun na ka bynta ka hok jong ki paidbah ha kane ka thaiñ, u Sangma u la ong, “nga la ïakhun ha ki por ba ladep bad ngan dang ïai bteng ban ïakhun. Kine ki dei ki jingshah tynjuh kiba ngi hap ban mad. Ngin trei na ka bynta ka roi ka par. Ngi donkam ïa ki song pynroi ba kin wan.”
U Myntri Rangbah u la ong ruh ba u don ka jingkyrmen lyngba kine ki jingïalang yn sa lah ban leh eiei na ka bynta ka jingbha ban pynthikna ba ki riewlum ritpaid ka thaiñ Shatei Lammihngi kin ym shah iehnoh ha ki ishu kiba bun kiba ap hakhmat.
Haba pynpaw ba ka thaiñ Shatei Lammihngi ka dei ka thaiñ kaba bun ki jyrwit jyrwat, u Sangma u la ong, ki don bun ki jingeh bad ki jingtynjuh bad ki don ki jaidbynriew kiba lehse kim ïohi markhmat bad ki don bun ki jaka bad bun ki ishu kiba tehsong pat ïa ngi.
“Bad ka bor jong ngi kan paw tang lada ngi ïatreilang. Namarkata, ha kum kine ki prokram, nga kyrmen ba ngin sa lah ban pynpaw ïa kiba bun ki mat,” u la bynrap.