Ngi ialong kum shipara ha kajuh ka ïing ym don jingïashrut ne ïapher jingmut ong ki 2 ngut ki Dy CM

Shillong, Naiwieng 05 : Shillong, Naiwieng 05 : Ki arngut ki Symbud Myntri Rangbah ka Jylla kata u Bah Prestone Tynsong bad kumjuh u Bah Sniawbhalang Dhar ki la pynpaw ka jingkyndit kaba khraw halor ka jingphriang ki khubor kiba kynnoh ba ka don ka jingïashrut kaba jur hapdeng jong ki ha ka jingtreikam.
Na ka liang u Bah Prestone uba dei ruh ha kajuh ka por u President ka National People’s Party (NPP) u la ong, “Nga kwah ban pynshai ba ka jingmih khubor kam dei satia kaba shisha bad nga nud ban ong ba kane ka khubor kadei kaba lamler lane kito kiba pynmih ïa kane ki dei kiba la shah pyndonkam da mano re.”
Shuh shuh u la kyntu ruh ïa kito kiba pynmih ïa kum kitei ki khubor ki dei ban da pynshisha ha shwa ba kin pyllait sha ki paidbah.
U Bah Prestone u la kyntu ruh ïa ki paidbah ba kim dei ban pdiang ïa kine ki khubor kiba mih tang namar ka buit politik jongno re.
“Nga kwah ruh ban pyntip ïa ngi bad katta nga la don bad ka NPP bad kumjuh slem bha bad ka Congress nga lap ba ka jingïapher hapdeng ka NPP bad ka Congress ka long ba ka NPP ka niew ïa ki dkhot jong ki kum ki bahaiing ha sem. Kata ka dei ka jingitynnad jong ka iing ka sem NPP la ka long naduh u National President, state president, district president lane ki district bad block unit kumjuh ki dkhot jong ka NPP la shim ïa ki kum ki dkhot jong ka iing ka sem. Kumta lada jia ba ngi don kaei kaei kaba ngim sngewtynnad lane halor ka jingphriang ki khubor ki bym dei ngi shonglang ban ïa pynbeit.” u la ong.
Ha kajuh ka por u Bah Sniawbhalang Dhar u la kyntait ïa ki jingkynnoh kiba saphriang ba ka don ka jingkynad bad ka jingbymsngewthuh jingmut hapdeng jong u bad u Bah Prestone Tynsong, uwei pat u Symbud Myntri Rangbah ka jylla.
Haba kren bad ki lad pathai khubor, u Bah Sniawbhalang Dhar u la ong ba kitei ki jingkynnoh kim don nongrim ei ei namar baroh arngut ki symbud myntri rangbah ki ïatrei lang kum kawei ka kynhun ha ka sorkar. Ha kajuh ka por, u Bah Sniawbhalang u la ong ruh ba kito kiba pynphriang ïa kum kitei ki khubor ki dei ban pynshai paidbah khnang ba kan ym ïalam bakla ïa ki paidbah.
“Ngi ïatylli bha bad ngi long kawei,” la pynskhem biang u Bah Sniawbhalang da kaba bad bynrap ba ma u bad u Bah Prestone ryngkat u Myntri Rangbah ka Jylla Conrad K Sangma ki ïatrei lang da ka jingïatylli. Shuh shuh u ong ruh ba ka iing bad ka sorkar NPP ka dei ka iing kaba heh bad kaba suk ba sain bad kam don jaka satia na ka bynta ki jingïakynad.
Ha kaba ïadei bad ka jingkynnoh halor ka jingai tiket na ka bynta ki kyrtong ha ka elekshon 2028, u la pynshai ba kane ka mat ka dang kloi than ban ïa kren namar na ka liang ka party bad kumjuh ka sorkar ki dang pyrkhat shwa ban trei na ka bynta ka roi ka pa ha ka jylla ym ban buh shwa ïa ka politik.
“Kane kam dei ka por ban ïa kren tiket, ngi dang don palat ar snem shiteng na ka bynta ka elekshon,” u la ong bad bynrap ba kam don kano kano ka jingthmu ban khang tiket ïa ki MLA kiba mynta.
“Kane kam dei ka por ban ïa tiket, ngi dang don palat ar snem shiteng na ka bynta ka elekshon,” u la ong bad bynrap ba kam don kano kano ka ban khang tiket ïa ki MLA kiba mynta.
Shuh shuh u ong ruh ba haduh mynta ym pat don ka party kaba don haduh 33 ngut ki MLA hynrei dei tang ka NPP bad kumta u ong ba ki khmih lynti ba ha u 2028 kin pynpra biang ïa ka rekod da ka jingjop bun ngut tang kawei ka party.