Ngi hap ban pyntreikam la ka jong ka ILP bad ngi dawa ruh ban buh ïa ka Territorial Army : GS KSU

Shillong, Nailar 18: Ka Khasi Students’ Union (KSU) ha ka sngi Nyngkong ka la rai ban pynjur ïa ka jingpyntreikam ïa la ka jong ka Inner Line Permit (ILP) la jong ha Meghalaya ban tehlakam ïa ka jingwan rung kyrthep ki poi ei shapoh ka Jylla bad kumjuh ruh ban dawa ban thaw noh da ka Territorial Army ha ka jylla. Haba kren shi lad pathai khubor u General Secretary ka KSU u Bah Donald V Thabah u la ong ba ka Seng kam banse ne don lad pat da kumwei pat hynrei ban shim ïa ka aiñ ha la ka jong ka kti namar ka Sorkar Pdeng bad ka Sorkar Jylla, ki la shu pynslem palat pud ban pyntreikam ïa ka ILP ha ka Jylla.
U la ong ba ka KSU ka dawa ruh ba ka Sorkar Pdeng ka dei ban ai ïa ka Meghalaya da ka Territorial Army, kaba ïasyriem thik kumba ai ïa ka jylla Mizoram, ban ïada ïa ki jaka khappud ka Jylla.
Hapdeng ka jingïakhih shong kyllaiñ myngor ne ka Sit-In-Strike ba la pynlong da ka NESO ha Shillong ha ka sngi Nyngkong, u General Secretary ka KSU u la ong, “Ngi la pynlong la bunsien ïa ki jingïakhih ban dawa pyntreikam ïa ka ILP. Hynrei, ka Sorkar Pdeng ka la sngap mynthi ban pyntreikam ïa ka ILP. Ka Sorkar Jylla kam shimkhia satia ban buddien ïa ka kam bad ka Sorkar Pdeng. Namarkata ka KSU kam banse ban pyntrei ïa la ka jong ka ILP ha la ka Jylla da ka jingbuh ïa ki dkhot ba kin talasi bad beh krad ïa ki poi ei bad ki briew ba i artatien, kiba wan rung sha jylla.”
Haba kylli, u samla Donald ula ong, “Ngi hap ban shim ïa ka aiñ ha la ka jong ka kti. Ngim banse ban leh ïa kane namar ba kam don satia ka aiñ ban ïada ïa ka jinglong kyrpang bad ka hok jong ki trai ri trai muluk. Namar kata, ngi sngewsih shibun ba ngi hap ban shim ïa ka aiñ ha la ki jong ki kti la jong.”
Haba phai halor ka jinglong jingman ba kulmar mynta ha Bangladesh bad ruh ka jingïaid ki kam kyndang mynder ri ba la pynlong da ka Sorkar Assam, u nongïalam ka KSU ula ong, “Ngi khuslai bha ba ka jingwan rung ki briew ba shah kyndang na Assam bad ki briew ba mad ïa ki jingshah thombor ha Bangladesh, naba kine ki lah ban wan rung shapoh ka Jylla.”
U la ïathuh ruh ba hadien ka jingïakhih jong ka NESO, ka KSU kan ïai bteng ban pynjur ïa ka jingkhynra ïa ki poi ei kiba wan rungtuh sha Meghalaya.
Halor ka ILP, u Samla Donald ula ong, “Ngim tip balei ba ka Sorkar ka pynslem ban pyntreikam ïa ka ILP hynrei ngi dawa ïa ka Sorkar Jylla ba kan buddien khlem shongthait namar ka kam ka la dawa ban leh noh mynta bad ha kawei ka sngi kan sa long dier palat. Katba ka Sorkar kam pat pyntreikam ïa ka ILP ne kino kino ki lad jingïada ïa ka jinglong kyrpang bad ka hok ki trai ri trai muluk, ka KSU kam banse ban shimti ïa ka aiñ ha la ka jong ka kti.”
Ha kaba ïadei bad ka jingdonkam ban pynkhlaiñ ka KSU ïa ki lad pahara ha ki jaka khappud, u Bah Thabah u la ong ba ka KSU ka la pynjur ïa ki jingpyrshang ban ïada bad pahara ïa ki jaka khappud ka jylla, khamtam hadien ka jingjia wan thombor ki runar Bangladesh ha South West Khasi Hills.
Katkum ka jingong u samla Donald, ki dkhot ka KSU kila peit pyrman bha ïa ki jaka khappud, kiba pynlong ïa ki jingtalasi kali bad ki briew kiba wan rung sha Jylla, bad kila ïatreilang bad ki Dorbar Shnong bad ki Rangbah Shnong ban pynithuh ïa ki briew kiba ishankhmat ba ki dei na Bangladesh.
U la ong ruh kumba ka long mynta ka KSU ka la ïatreilang ruh bad ki shipai Border Security Force (BSF) bad ki Pulit ban pynkhlaiñ ïa ki jingpahara ha khappud. Na ka liang jong u pat ula pynpaw ïa ka jingsngewkhia halor ka jingtreikam ki Pulit da u pud khlem kano kano ka aiñ kaba kyrpang ban leh eiei pyrshah ïa ki poi ei.
“Ngi la ïatreilang ruh bad ki Pulit hynrei la ïohi ba ki Pulit kim donbor satia khlem kano kano ka aiñ ba kin lah ban leh eiei pyrshah ïa kito ki briew kiba wan rung beaiñ shapoh ka Jylla,” ula bynrap.
“Watla ki BSF ki la peit ïa ki jaka khappud, ki briew ki ïoh ban rung sha jylla jong ngi hynrei ki don katto katne ki jaka ha khappud khamtam ha ki thaiñ Pynursla, ka circle jong ngi ka la trei shitom bha bad ki la ïashong jingïalang bad ki BSF khnang ba ka KSU bad BSF kin ïapeitngor lang ha kane ka thaiñ,” bynrap u General Secretary ka KSU.