Ngi donkam ban pynkhlaiñ ïa ki pulit SF 10 ban ai ki lad jingïada na ki kynhun lehnoh: Dr.Mukul

Shillong, Rymphang 27: U Nongïalam ka liang pyrshah u Dr. Mukul Sangma u la ong ba ha ka por ba u dang long u Myntri Rangbah ka jylla u la ïoh jingtip ïa ka jingïaid jingïeng jong ki lehnoh.
“Ngi shait ïoh jingtip ha kaba ïadei bad ki kynhun lehnoh shano ki leit ki wan,” ong u Dr. Sangma ha ka kynta ka jingïatai ïa ki kam ba ka tnat pulit ka la leh ha kaba ïadei bad kane ka bynta.
Une u nongïalam ka liang pyrshah u la ong ba dei halor kane ba ka sorkar jong u ka la pynmih ïa ka Special Force (SF) – 10 ha kaba kane ka la ïarap shibun ïa ki samla.
U la ong ruh ba ki pulit SF 10 ki la dei kiba la ïoh ka jinghikai kaba biang ha kaba ïadei bad ka kam ïakhun ïa ki lehnoh.
U la ong pat ba mynta kine ki pulit la ïohi ba ki pynïaid ïa ki kali bad kane ka la pynleh nohei ïa ka jingpynlut jong ka sorkar.
“Ngi donkam ïa ka sorkar ba kan pynmih shibun ki kam ban thaw bun ki battalion bad ban buh ïa ki ha ki jaka treikam bapher bapher da kaba siew bha ïa ka tulop jong ki,” ong u Dr Sangma.