Ngim dei ban riej ban ïatai ïa ki mat ki phang kiba ktah eh ïa ka jaidbynriew Khasi ha kine ki por kiba mynta. Kane ka jylla kam don kano kano ruh ka jingkdew lynti kumno ban kyntiew ïa ka ioh ka kot; ban thaw ïa ki lad pynïoh kam ïoh jam ïa ki samla kiba dang khie dang san. Namar ba ym ïohi satia ïa ki lad trei kam kumba long lem ha kiwei ki jylla, mynta hangne ha ka jylla jongngi lah shu ïa ïohi sa tang ïa ki par maw, ki par dewiong bad ki par mawshun. Ka jingtih ïa kine ki mar poh khyndew ka la pynjulor ïa ka mariang namar ki heh spah kiba long trai ïa kitei ki par dewiong/mawshun/maw kim salia la ki hap ban pom lut ïa ki khlaw tang ba lah biang ïalade shimet. Bun kita ki trai jong kine ki par bapher bapher kim dei kiba na kato ka shnong. Na kata ka daw kim salia la ka khlaw ka thylli noh bad ki tlong um ki rkhiang lut bad ka lyer khuid ban ring mynsiem ruh ym ïoh shuh.
Ki khynnah skul baroh haba ki pule ïa ka kot saian kaba kynthup ruh shibun ki jingtip halor ka mariang (environment) naduh Class 5 ter ter ki tip bha ba ki dieng ki long kum kita ki khiew kiba kynshew ïa ka lyer khuid ‘oxygen’ bad kiba tan pat ïa ka lyer jakhlia ‘carbon dioxide.’ Ka lyer jakhlia ka mih haba ngi pynhiar mynsiem mangi ki briew bad ki mrad, ryngkat bad ka tdem kali bad ka tdem dpei ding ha ki ïing ki sem. ïa ka lyer bih carbon dioxide la pynkhuid pat da ki sla dieng kiba pynkylla oxygen ïa ka. Bad dei kane ka oxygen ïa kaba ngi ki briew ngi donkam ban ring mynsiem khnang ba ngin lah ban im. Te pyrkhat katno shuh ka jingkordor ïa ka jingdon jong ki dieng ki siej ha kaban wanrah ïa ka jingkoit jingkhiah na ka bynta jongngi ki khun bynriew bad ki kynja ba im.
Kaba sngewsih ka long ba ngim ju pyrkhat jngai haba ngi ïohi ba pom pathar ïa ki dieng ki siej ha shnong ha thaw. Baroh ngi ïa sngap jar namar ba ngi lah tip lypa ba kita kiba pom deng ki dei ki heh spah (high level) kiba la ïoh jingbit na ki dorbar shnong lane na ka District Council. Hynrei hato ka long mo ban shu ïa sngap mynthi kumne bad ban shu ai lad tang ïa ki katto katne ba kin pynjot ïa ka mariang jongngi? Mano ba ai bor ïa ki katto katne ba kin long trai halor ki khlaw ki btap bad ba ki tih mar spah khyndew katba mon khlem da ïaleh pat ban thung kylla da kiwei pat ki dieng ynda haba lah dep pyndonkam ïa ki par maw/dewiong/mawshun.
Kito kiba poi sha Shella nga tharai ki ïohi bha ïa ka rukom tih mawshun da ki mahajon shimet kiba pynkit pat ïa uta u mawshun sha Bangladesh. Kham pajih khyndiat pat don ka Nongtrai kaba la ai wai ïa ka par mawshun ïa ka kompeni Lafarge kaba na ri Phrans. ïa kane ka kompeni pat ka ïingshari heh duh ka buh da ki kyndon kiba pyrkhing bha ha kaba ka hap ban siew 90 tyngka shi ton u mawshun sha kata ka Special Purpose Vehicle lane ka kynja nongpeit pyrman kumno ban pyndonkam ïa kata ka pisa na ka bynta ban pynbha ïa ki lynti ki syngkien, ban thaw lad trei kam kum ban ri sniang, ri masi, ban thung bad rep ïa ki dieng soh ban pynbha lane shna ïa ki ïing skul kiba bha bad ki ïing dorbar lane ki community hall kiba dondor lem bad ka ai ruh ïa ki shuki shong kiba biang tam. Nalor kata la pynbha ruh ïa ki lad sam um bam um dih bad ruh ïa ki lad ai jingïarap ïa kiba pang da kaba ai ki ambulance bad kumta ter ter. La shna pynbha ïa ki madan ïalehkai ki khynnah (stadium).Ka jingkylli mynta ka long hato kita ki trai shimet kiba tih mawshun na kato hi ka jaka ki ai aiu ïa ka shnong bad ki noh synniang aiu na ka bynta ka imlang sahlang? Hato ki la thung mo uwei ruh u dieng ha ka jaka ba la dep pyndonkam bad lah lut u mawshun? Hato ki la ai mo kawei ne ka ambulance ne ki la ju ai scholarship ïa ki khynnah ban leit pule pyntbit ïalade? Em, ym don eiei kum kata. Ka jingkamai ka leit beit sha ka pla u trai par mawshun.
Kaba phylla shuh shuh pat ka long ba ka Shella Action Committee kaba la leit ujor sha ka ïingshari ba ha khlieh. duh (Supreme Court) ha ki snem 2012-13, kam don eiei ruh ban ong pyrshah ïa kita ki trai par mawshun kiba dei ki riew shimet bad ki bym don jingkitkhlieh eiei ruh na ka bynta ka mariang. Haba peit ïa kito ki par mawshun kiba la iehnoh shrah tip ba lah lut u mawshun ne kumno, la i par met shisha. Man ki kompeni ki dei ban don kata ka jingkitkhlieh ban leh eiei na ka bynta ki briew kiba shong ba sah hajan kito ki par dewiong/mawshun/maw. ïa kata la khot ka Corporate Social Responsibility (CSR) bad ki kompeni ki dei ban pynlut 2 tyngka na man ka 100 tyngka ba ki ïohnong na ka jingïadie ïathied jong ki. Kane ka mut ba lada ka jingïohnong ka long 50 lak shisnem ki dei ban pynlut shi lak tyngka na ka bynta la bha ka miat jong kata ka shnong na kaba ki tih ïa ki mar spah khyndew. Hynrei ngim ïohi eiei ruh kum kata. Peit ïa ka Jaintia Hills bad West Khasi Hills kaba la tih dewiong da ki phew snem bad la ïoh kamai ki riew shimet na ki phew spah klur tyngka hynrei tang kawei ka skul lane ka hospital kaba la tei da ki mahajon khaïi dewiong ne mawshun ruh ngim pat ïohi haduh mynta.
Dei halor kine kiei kiei keiñ ba ka jaitbynriew ka la dei ban ïathir bad kdew lynti lem ïa kiba ïaid wir. Haduh lano keiñ ngin shu ïa sngap bad ai lad ïa ki katto katne ki riew kwah lum spah jyndat ba kin ïuhroit ïa kane ka mei mariang jongngi kaba ka kdup la piam ïangi mynta lah bun pateng. Lada ngi dang ïai sngap mynthi kumne te ka jingma bakhraw ka ap ïangi bad ka jingduk kan nang ban shuh shuh ïa kito kiba lah duk lypa. Uba riewspah te u la nang kit spah. Hato kane ka dei kata ka jaitbynriew tip briew tip blei ïa kaba ngi sngew sarong?
