Shillong, Nohprah, 11: U Vice President jong ka Meghalaya Pradesh Congress Committee (MPCC) u Bah Ronnie V. Lyngdoh uba long ruh u MDC jong ka Mylliem Constituency ha ka sngi Balang u la pynthikna ba ka Congress kan hap ban weng noh ïa ka jingai jingkyrshan na ka Executive Committee ba la ïalam da ka National Peoples Party (NPP) ha Khasi Hills Autonomous District Council (KHADC) ka dei ka jingbthah jong ka party.
Ha ka jingïakren bad ki lad pathai khubor u Bah Ronnie Lyngdoh u la ong, “ngi dei ki briew jong ka party bad ngi kohnguh ruh katba ka party ka pynïaid bad katba ka party ka bthah ïa ngi.”
Haba pynshai ïa ka jingai jingkyrshan ïa ka Executive Committee ba la ïalam da ka National Peoples Party (NPP) u Bah Ronnie u la ong, ‘ha kato ka por ka don ka jingïakynad kaba jur bha hapdeng ka UDP bad ka NPP. Kaba pynlong ïa ngi ban ai jingkyrshan ka long ba ngi sheptieng lada jia ba khyllem ka Executive Committee u Lat un ai noh da ka jingsynshar Administrator. Ka jingshim rai jong ngi, kam dei ba ngi pyrkhat ïa kano kano ka daw hynrei ngi pyrkhat ba kan don ka jingpynbeit thymmai ïa ka Khyrnit Bahynriew. Lada ngim ïadon lang ma ngi ban ai jingmut ha ka jingpynbeit thymmai bad lada ki don tang ki ophisar ban ai jingmut ki lah ban ai jingmut ïa ka jingpynbeit thymmai (ïa ka Khyrnit Bahynriew) kaba pyntlot bor ïa ka District Council bad ïa ka jaidbynriew jong ngi namarba ka District Council ka dei kaba pynneh ïa ka khyndew ka shyiap, ka riti ka dustur bad ka synshar ka khadar ba la buh da ki longshwa ki manshwa namrba ngi dang don ïa ki Dorbar Raid bad ki Dorbar Hima bad ki Dorbar Shnong bad ki aiñ kiba tehlakam ban pyrkhing ïa ka khaii ka pateng jong kiwei pat ki jaidbynriew bad lada weng noh ïa kita kan buh jingma hi ïa ka jaidbynriew.”
“Ngi shim ïa ka rai (ban kyrshan ïa ka EC jong ka NPP ha KHADC) halor kata ka nongrim ym na kiwei pat ki daw bad ka party ruh ka sngew ïahap bad ngi bad mynta ka party pat ka ong ba dei ban mih noh bad kum ki briew kiba ïaid beit bad bud ïa ki kyndon jong ka party ngi hap ban kohnguh ïa ka party kaba btha ïa ngi,” la ong shuh shuh u Bah Ronnie.
Haba kylli, u la ong, “ngim pat ïakynduh ïa ki heh ka Sorkar India ban ïakren halor ka jingpynbeit thymmai ïa ka Khyrnit Bahynriew.”
U la ai nuksa ruh da kaba ong, “ka la don ka jingkwah ban kynthup lang ïa ki Unrepresented Tribe. Ngi la ong ba ki Unrepresented Tribe ki dei ban long katkum ka jingai jingmut jong ka District Council ym dei ban thung da u Lat hynrei u hap ban shu ai tang ïa ka jingmynjur. Ngi ïasnoh hangne (ha ka EC jong ka NPP ha KHADC) halor kita ki nongrim hynrei ym na kano kano ka daw.”
“Kum ka Congress kaba la ai ïa ngi ïa ka Sixth Schedule ngi sngew don ïa ka jingkitkhlieh bad ka jingdap ram ïa ka jaidbynriew ba kane ka aiñ kaba la kynjoh mynta la jan 70 snem tam kata naduh u snem 1952 ba kam dei ban tlot bad ba kan buh ïa ka jaidbynriew ritpaid jong ngi ha ka jingma namarba ka jingïada kaba ngi ïoh ka dei lyngba ka aiñ. Kane ka Sixth Schedule ka dei ka jingkyrkhuh ïa ka jaidbynriew jong ngi,” la pynpaw u Bah Ronnie.
Shuh shuh u la pynshai ruh ba ka Sixth Schedule ka dei kaba kongsan haduh katta katta ha kaba wat u Sonam Wangchuk na Ladakh ruh u la ïakhih ban dawa ïa ka Sorkar India ban pynkupbor ïa ki riewlum ba dang sahdien ka Ladakh da ka Sixth Schedule.
“Na kata ka daw ngi hap ban sngewthuh ba ma ngi kiba la don ïa kane ka aiñ, ngi hap ban pynneh pynsah bad ban peit ba kane ka aiñ kam dei ban pyntlot ïa ka jaidbynriew jong ngi,” la bynrap u Bah Ronnie.
“Lada ka wan ka jingpynbeit thymmai ha ka Sixth Schedule, kan weng ïa ki jingïada ban pyntlot bor ïa ka jaidbynriew jong ngi bad ma ngi hi (ki MDC) ngin sa hap ban ai jubab ïa ki paidbah. Na ka bynta ka jingbha jong ka jaidbynriew bad ka jylla ngim buh ïa ka party hakhmat ngi buh shwa ïa ka jaidbynriew bad ïa ka jylla hakhmat eh,” la pynshai shuh shuh u Bah Ronnie.
