Ngi dei ban long kiba la khreh ban ïada, ban ïakhun ïa ki jingjia ban wan ba ïadei bad ka koit ka khiah : Modi

New Delhi, Nailar, 19: U Myntri Rangbah duh, u Narendra Modi haba kren ha ka jingïalang jong ki Myntri ki ri G20 ba dei khmih ïa ka Tnat ka koit ka khiah ha Gandhinagar, Gujarat lyngba ka video message u la pdiang sngewbha ïa ki heh ki hain na ka liang ki 2.1 million ngut ki doctor, 3.5 million ngut ki nurse, 1.3 million ngut ki paramedic, 1.6 million ngut ki pharmacist bad ki million ngut kiwei kiwei kiba don bynta ha ka kam ai jingsumar ha India.
Haba kren shaphang u kpa jong ka jaitbynriew, u Myntri Rangbah duh u la ong ba u Gandhi u shim ïa ka koit ka khiah kum ka bynta kaba kongsan bha ha kaba u la thoh kawei ka kot kaba kyrteng ka ‘Key to Health’ kaba ïadei bad kane ka phang. U la ong ban long kiba koit ba khiah u briew u dei ban don ka jingsukmynsiem ha ka jingmut jingpyrkhat bad ka met ka phad hapdeng ka jingryntih, kaba mut ba ka koit ka khiah kadei ka nongrim jong ka jingim.
U Myntri Rangbah duh u la pule ïa ka Sanskrit ‘shloka’ kaba mut: ‘ka koit ka khiah kadei ka spah bad lah ban pyndep ïa man ka kam lyngba ka met kaba koit ba khiah.’
Shuh shuh u la ïai ban ba ka khlam Covid-19 ka pynkynmaw ba ka koit ka khiah kadei ka nongrim jong ki rai ba ki shim. U la ong ba ka por ka la pyni ruh ïa ka jingkongsan ka jingïatreilang bad kiwei kiwei ki ri, la ka long ha ka jingpynpoi ïa ki dawai bad ki dawai tika lane ka jingwanrah ïa la ki jong ki briew sha la ri.
Haba kren shaphang ka sienjam jong ka Sorkar India ban pynbiang dawai tika COVID-19 sha kiwei ki ri, u Myntri Rangbah duh u la ong ba hapoh ka sienjam Vaccine Maitri, ka India ka la pynpoi 300 million ki dose dawai tika sha palat 100 tylli ki ri, kynthup bun ki ri shaphang shathie.
Da kaba ong ba ka jingskhem jingmut ka
dei ka jinghikai kaba kongsan tam kaba la mih na ka por jong ka khlam, u Myntri Rangbah duh u la ong ba ki kam ai jingsumar ha kylleng ka pyrthei ki dei ban long kiba skhem. “Ngi dei ban long kiba la khreh ban ïada, bad ban ïakhun ïa ki jingjia ban wan ba iadei bad ka koit ka khiah. Kane kalong kongsan ha kane ka pyrthei mynta kaba bun ki jingïadei. Kumba ngi la ïohi ha ka por jong ka khlam, ki jingeh ba ïadei bad ka koit ka khiah ha kawei ka bynta jong ka pyrthei ka lah ban ktah ïa baroh ha kiwei ki bynta jong ka pyrthei tang hapoh ka por ba lyngkot,” u la ong.
Shuh shuh u la bynrap biang da kaba ong, “Ha India, ngi bud ïa ka rukom treikam kaba kynthup lang ïa baroh,” la ong u Myntri Rangbah duh. U la ong ruh ba ki la pynïar ïa ki jingdon jingem ba ïadei bad ka koit ka khiah, kyntiew ïa ki rukom ai dawai tynrai, bad pynïoh ki lad jingsumar ba jemdor ïa baroh. Ka jingrakhe ha kylleng ka pyrthei ïa ka International Day of Yoga kadei ka dak jong ka jingkwah ki briew baroh ïa ka koit ka khiah.
La pyntip ruh ba mynta u snem 2023 la ithuh kum ka International Year of Millets. Ki krai lane ‘shrïanna’ kumba ju tip ha India, ki don shibun ki jingmyntoi ba ïadei bad ka koit ka khiah.
U Myntri Rangbah duh u la ong ki ngeit ba ka koit ka khiah bad ka bha ka miat ka lah ban kyntiew ïa ka bor jong baroh. Ka jingplie ïa ka WHO Global Centre for Traditional Medicine ha Jamnagar, Gujarat k along ka sienjam kaba kongsan ha kane ka bynta. Bad, ka jingpynlong ïa ka WHO Global Summit halor ki dawai tynrai ryngkat bad ka jingïalang ki Myntri ki ri G20 ba dei khmih ïa ka koit ka khiah kan pynkhlain ïa ki sienjam ban ïoh ïa ki jingmyntoi na kine. Dei ban don ka jingïatreilang ban tei ïa ka tyllong na kylleng ka pyrthei jong ki dawai tynrai.
Haba kren shaphang ka jingïadei ka koit ka khiah bad ka mariang, u Myntri Rangbah duh u la ong ba ka lyer kaba khuid, ka umdih kaba shngain, ka bam kaba tei, bad ka jaka sah kaba shngain ki dei ki bynta ba kongsan jong ka koit ka khiah. U la ai khublei ïa ki heh ki hain kiba la plie ïa ka sienjam halor ka jinglong ka suinbneng bad ka koit ka khiah. U la ong ba dei ban ai ka jingïaroh ruh ïa ki sienjam ba la shim ban weng ïa ka jingma jong ka Anti-Microbial Resistance (AMR).
U Myntri Rangbah duh u la ong ba ka AMR kadei ka jingma ïa ka koit ka khiah jong ki briew ha kylleng ka pyrthei bad baroh ki jingkiew shaphrang kiba ïadei bad ki dawai haduh mynta. U la pynpaw ka jingkmen ba ka G20 Health Working Group ka phaikhmat kyrpang sha “Kawei ka Koit ka Khiah”. Ka thong jong ngi kalong “Kawei ka Pyrthei, Kawei ka Koit ka Khiah” kaba thmu ban don ka koit ka khiah kaba bha ïa baroh – na ka bynta ki briew, ki mrad, ki jingthung bad ka mariang. U la ong kane ka jingïasohlang ka rah ïa ka khubor jong u Gandhiji ban nym iehbein ïano ïano.
Haba kren shaphang ka jingkongsan ka jingïashim bynta ki briew ka long kaba kongsan na ka bynta ka jingjop jong ki sienjam kiba ïadei bad ka koit ka khiah, u Myntri Rangbah duh u la ong ba ka long kawei na ki daw ba kongsan jong ka jingjop ka campaign ban pynduhjait ïa ka jingpang leprosy. U la ong ka prokram jong ka India ban pynduhjait ïa ka jingpang TB ruh ka pynshlur ïa ka jngïashim bynta ki paidbah. U la ong ba ki la kyntu ïa ki briew jong ka ri ban long ki ‘Ni-kshayMitra’, ne ‘ki paralok ban pynduhjait ïa ka jingpang TB’ ha kaba jan 1 million ngut ki nongpang la pdiang da ki nongshong shnong.
“Mynta, ngi don ha ka lynti ban kot sha ka thong jong ka jingpynduhjait ïa ka jingpang TB hashuwa ka por ba la buh ha kylleng ka pyrthei kaba long u 2030,” la ong u Myntri Rangbah duh.
Ha ka jingban jur ïa ka bynta jong ki lad digital bad ki jingsaindur thymmai ban pynïoh ïa ki lad jingsumar ïa baroh, u Myntri Rangbah duh u la ong ba k ilong kiba ïarap bha ban wanrah jingryntih ha ki sienjam jong ngi namar ki nongpang na kylleng ki jaka ki lah ban ïoh ïa ka jingsumar kaba bha lyngba ka tele-medicine. U la ïaroh ïa ka rynsan e-Sanjeevani jong ka ri, da kaba ong ba ka la plié lad ban don haduh 140 million tylli ki jingai jingsumar lyngba kane haduh mynta.
U Myntri Rangbah duh u la ong ka rynsan COWIN jong ka ri ka la pyntreikam ïa ka jingai dawai tika kaba ïar tam ha ka histori jong ka pyrthei. U la ong ka peit ïa ka jingpynpoi palat ar point ar billion dose ki dawai tika, bad ka jingpynbiang ha kanokano ka por ïa ki certificate kiba treikam ha kanokano ka bynta jong ka pyrthei. Ka Global Initiative on Digital Health kan wanrah lang ha kawei ka rynsan ïa ki bynta bapher bapher kiba ïadei bad ka jingai jingsumar lyngba ki lad digital.
“To ngin wanrah ïa ki jingsaindur thymmai jong ngi na ka bynta ka jingbha jong ki briew. To ngin kiar na ka jingpynbun ki jingbei tyngka. To ngin pynsuk ka jingdon ryntih ka teknoloji,” la kyntu u Myntri Rangbah duh. U la ong kane ka sienjam mynta kan ailad ïa ki ri ha ki bynta shathie ban pyndap ïa ki jaka ba suda ha ka jingpynpoi ïa ki jingai jingsumar bad kan ïalam ïa ngi ban kot sha ka thong ban lah ban ai ki lad ïoh jingsumar ïa baroh.
U Myntri Rangbah duh u la pynkut ïa ka jingkren jong u da ka ktien kitbok jong ka ri na ka bynta ki briew ha ka Sanskrit kaba ong, ‘To baroh kin long kiba kmen, to baroh kin lait na ka jingpang jingshitom.’ Nga kitbok ïa phi na ka bynta ki jingïamir jingmut jong phi.’