Shillong, Ïaiong 11 : Ka Shad Suk Mynsiem mynta u snem ka la long kaba shongkun haduh katta katta bad kadei ruh ka sien kaba nyngkong hadien ka khlam COVID, ba ki nongshad ki la poi syndon haduh palat hajar ngut.
Na ki 1196 ngut ki nongshad kiba wan na kylleng ki bynta jong ka Rilum Khasi, haduh 618 ngut ki dei ki rangkynsai bad 578 ngut pat ki dei ki thei sotti.
Da kaba batai bniah shaphang ka Shad Suk Mynsiem ba kumno ki ‘thei sotti ki shad hapdeng bad u shynrang pat u ker sawdong ïa ki, u Bah Païa B Synrem, Assistant General Secretary ka Seng Khasi Kmie u la ong ruh ba kane ka long ban pynkynmaw ba ki shynrang ki don la ka jong ka bynta ban sharai ban phira ïa ka Long Kur Long Jait bad ruh ïa ka longshnong longthaw.
“Ngi dei ban kynmaw ba ngi dei ki Khun dap shynrang bad kumba ngi bat ïa ka waitlam ha ka kti, kano kano ka jingleh be-ijot ïa ka Ri bad ka Jaidbynriew ngin ym shah satia da lei lei ruh,” u la ong haba kren bad ki lad pathai khubor.
Nalorkata, u ong ruh ba ka pansngiat ba ki kynthei ki phong ka pyni ïa ka jinglong khuid long suba jong ki. U Bah Païa u ong ruh ba lyngba katei ka shad ki buh ïa ka ainguh aidem ha u Kynrad ba un nang ïai kyrkhu ha ki por bad ki snem kiban dang wan.
Shwa kane, utei u Rangbah u la ong ba ka jingkyntu kaba ki ai na ka bynta ka Jaidbynriew ka long kumno ban pynïaid ïa ka ïing ka sem da ka jinglong kaba hin hin kaba jai jai ban phuh ka Jaidbynriew lyngba ka bha ka miat ki longïing longsem.
U la ong ruh ba ka Shad Suk Mynsiem ka la nang phuh nang phieng mynta da ka jingnang bun ki nongshad katba nang mih ki snem. Ha kane ka sngi la sakhi ruh da ki hajar ngut ki paidbah ki la wan ha ryngkat ki khor ki khriam bad ki riam ki beit tynrai ban sakhi ïa katei ka jingshad.
