Ngi dei ban ïakhun ïa ka CUET ban ïaryngkat bad kiwei

Sohra, Jymmang 26: U Samla Nazariolan Synrem, u Samla ba la wan ha ka kyrdan ba saw ha Top 10 jong ka Result Class 12 Science, u la ong ba ki samla jong ka jylla kim dei satia ban randien na ka jingïakhun ïa ka Common University Entrance Test (CUET) namar kane kan ïarap ban ïaryngkat bad kiwei pat ki Samla pule jong ka ri India.
Haba ïakren bad u Nongthoh khubor, une u Samla pule ba la pass na RKM Sohra, bad uba wan ba nyngkong na ka liang ki Samla Khasi, u la ong pat ba ïa mynta te ym pat long ban ïakhun ïa kane ka eksam, hynrei donkam shuwa ka jingpyntbit naduh ki klas kiba rit bad ban hikai kum ka genaral aptitude, ka logical reasoningkhnang ban lah ban ïakhun ïa kane ka test bad donkam ban pynrung ïa kine ha ka syllabus.
U Nazario, iba la ïoh highest mark ha ka Biology, u la ïathuh ba u kwah ban leit pule Medical hadien ka jingpyndep jong u ïa ka Class 12. Halor kane ka jingwan jong u shakhmat ha kane ka eksam, u la pynpaw ka jingsngewkmen kaba khraw da kaba pynpaw ka jingsngewnguh ïa U Blei, ka jingkhublei ruh ïa ki kmie ki kpa, ki nonghikai bad ki paralok jong u.
Halor ka jingkylli pat ka buit ba u pyndonkam haba khreh kot, une u samla pule na ka Shnong Mawkisyiem, Sohra, u la ong ba um shym la pyndonkam da kano kano kawei pat ka buit, hynrei u khreh hi kumba u ju khreh, tangba u kham trei shitom bad pyllut bun kynta ban khreh kot. Ha kajuh ka por u bynta ruh ka por ban khreh kot, ban ïalehkai bad treikam haïing ruh kumjuh.
I Kmie jong u Nazario, haba pynpaw ïa ka jingsngewkmen na ka bynta ka jingpass bha u khun, i la ong ba i da sngewhun hi jrut ba u khun uwan ha ka kyrdan top 10 bad i la ïathuh ruh ba u ju peit miet lang bad u haduh 12 ne 1 baje mynmiet ban pynkhreh jingbam bad jingdih ïa u. “Nga snew ba kum ki kmie ki kpa, ngi dei ban ai jingkyrshan ïa ki khun bad don ha syndah jong ki, haba ki don hapdeng ka jingpule”, i la ong.