Shillong, Jylliew 22 : Ka jinglyngshop ki bor ka mariang ka la ktah sa ïa ka shnong Moheshkola, South West Khasi Hills ha kaba ka jingther u lapbah bad ka jingshlei um ka la syllad naphang ïa ka iew ka hat bad ka thain hi baroh kawei.
Ki nongshong shnong ki la pyntip ruh sha u Myntri Rangbah ka jylla ba ha ka miet 16tarik mynta u bnai, ka la don ka jingther jong u lapbah ba jur tad haduh ba ka jingshlei um ka la sar naphang lut ïa ki jingdon jingem kiba don ha katei ka thain.
Ki la ong ruh ba nalor ba ki iew ki hat ki la shah lyngshop lut, mynta kim don shuh wat tang ïa u khaw nalor ba ki ïing ki sem ki la shah pynjulor lut.
Ki nongshong shnong ki ong ruh ba ka jinglong jingman ka la nang kham sniew kaba la poi haduh u pud ba ki nongshong shnong ki hap ban leit dara ïing sha khlaw.
“Ngi kwah ba ka sorkar kan tip ïa kane bad ruh ban wan pyllait im ïangi da kaba phah da ki helicopter ban pynpoi ïa ki bam ki dih, ki jain ki nep, ki dawai bad ki tyrpar,” ong u G Marak uwei na ki nongshong shnong ka thain.
La ïathuh ruh ba ka surok National Highway kaba pynïasoh na Ranikor sha Baghmara la khang, ki jingkieng bad ki nala ki la khyllem lut bad ki la don ruh da ki hajar tylli ki jingtwa khyndew ha ka thain baroh kawei.
Ki la ong ruh ba wat ka shnong Khalu na West Khasi Hills bad South Garo Hills ki la shah pynjulor lang ha katei ka jingshlei um, bad shah pynjulor lut ruh ki ïing ki sem, ki skul bad ki ïing dorbar kynthup wat ka ïingmane.
