Shillong, ïaïong, 13: Ki Pulit ka East Jaiñtia Hills District ki dang pynlong ïa ka jingtohkit kaba bniah bha halor ka jingïohkem ïa lai ngut ki snar khaii drok ba kynthup ïa kawei ka kynthei kiba la shah kem ha ki Pulit jong ka ANTF ka East Jaiñtia Hills District.
Katkum u kyrwoh ba la phah da u Superintendent of Police ka East Jaiñtia Hills District, ki Pulit jong ka Anti-Narcotic Task Force bad ki Pulit ka Ladrymbai Police Out Post kiba la ïoh jingtip na ki tnat syntiat ki la pynap shrip ha Ladrymbai bad ïohbat ïa kawei ka kali Bolero kaba don ïa u nombar NL-04 C 3516 kaba wan na Silchar, Assam ban leit sha nongbah Shillong.
Hadien ka jingtalasi ïa ka kali ha ryngkat ka jingdon lang jong ki nongsakhi, ki Pulit ki la ïoh kurup haduh 50 tylli ki jingthep sabon kiba la thep ïa u drok bad ba la buhrieh bha ha ka Chasis jong ka Kali. Une u drok hadien ba la thew u khia 411.17 gram.
Ïa kine ki lai ngut la register case ha Khliehriat Police Station bad la pynngat hapoh ka kyndon 8 (C)/22 (C)/ 27 (C) jong ka NDPS Act. Ki Pulit ki dang pynlong ka jingtohkit kaba bniah ban ïohkem sa ïa kiwei pat kiba donkti.
Ha ka jingïakren bad ki lad pathai khubor, u Myntri ka tnat Kam Pohing u Bah Lahkmen Rymbui u la ong, “hynnin ka sngi Baar ki Pulit ka East Jaiñtia Hills ki la ïoh bat ïa kawei ka kali Bolero kaba kit ïa u drok bad lai ngut ki briew kiba donkti ki la shah kem.”
“Ïa mynta ka jingtohkit ka dang ïaid shakhmat ban tip na kano ka jaka la wan kit ïa u drok, shaei yn leit rah bad mano ba donkti ha kane ka kam,” la ong u Bah Rymbui.
Haba kylli, u la ong, “ka jingtohkit ka dang ïaid ban lap dien ïa u Kingpin ne u snar nongkhaii bad ban wad ïa ka jaka sah. Ïa kane ngi la ïatreilang da baroh ki Agency jong ka Sorkar Jylla bad ka Sorkar Pdeng bad lada ki don ha kano kano ka jaka ruh ngin leit kem.”
U la ong ba ka Tnat Pulit ka don la ka jong ka tnat syntiat bad na ka por sha ka por ka ju peitngor ïa ki kali kiba ïaid ha shilynter ka surok. “Don ki khep ba la ïohkem ïa une u jingdih pynbuaid na Nongpoh namarba ïa kane ka jylla jong ngi ki briew kiba nabar ki ju pyndonkam kum ka lynti ïaid ban shalan be-aiñ ïa u drok sha ka Ri Bangladesh.”
“Dei na kata ka daw ba ki Pulit bad ki shipai BSF ki ju ïatreilang na ka por sha ka por ban tehlakam ïa ka jingshalan be-aiñ ïa u drok sha ka ri Bangladesh,” u la ong.
