Ngat ka India ha ka Group D ryngkat ka Uzbekistan, Australia & DPR Korea

NEW DELHI, Rymphang 12: Ka India ka la shah kynthup lang ha kajuh ka Group D ryngkat bad ka Uzbekistan, Australia bad ka DPR Korea ha ka lympung AFC U17 Asian Cup 2026 ha Saudi Arabia hadien ba la pyndep ïa ka jingpynïakap kynhun ba khatduh (Final Draw) ba la pynlong ha AFC House ha Kuala Lumpur, Malaysia, ha ka sngi Palei, 12 tarik Rymphang, 2026. Kane ka lympung kan sdang naduh 05 tarik haduh 22 tarik Jymmang.
Ka India ka la rung sha ka AFC U17 Asian Cup ha ka sien kaba 10 ha ka histori hadien ba ka la lah ban pyndep kham hakhmat ïa ka IR Iran, Lebanon, Palestine bad Chinese Taipei ha ki jingïalehkai ïaknieh rung (Qualifier).
Ka kynhun ki samla lud shynrang jong ka ri India kin sdang ïa ka jingïalehkai ba nyngkong jong ki ha ka AFC U17 Asian Cup pyrshah ïa ka Australia, bud sa ka jingïakhun pyrshah ïa ka Uzbekistan bad ka DPR Korea.
Ka Uzbekistan kadei ka kynhun kaba bat ïa ka nam lahduh, kaba pynlong ïa ka ban rung beit beit sha kane ka lympung khlem ka jingïaknieh. Katba ka Australia ka la khyllem noh ha ka group stage ha ka sienjam jong u snem 2025 bad ka la rung sha kane ka lympung mynta y snem 2026 hadien ka jingjop pyrshah ïa ka Jordan, Bhutan bad Philippines. Ka DPR Korea kaba la rah nam lahduh la arsien, ka la poi sha ka semi-final ha u snem 2025, kumta ka la ïoh ruh ban rung hi dalade sha ka lympung kaba mynta.
Ha ka Group A, ka Saudi Arabia ka ri ban pynlong ïa ka lympung, ka la ngat lang ha kajuh ka thup bad ka Tajikistan, Thailand, bad Myanmar. Nangta ki kynhun ha ka Group B ki kynthup ïa ka Japan, Indonesia, China PR bad ka Qatar. Ka Group C ka don ïa ka Korea Republic, Yemen, Vietnam bad ka United Arab Emirates.
Ki ar tylli ki kynhun kiba pyndep hakhmat eh na kawei pa kawei ka Group kin ïoh rung sha ka Quarter-final bad kin pynskhem ruh ïa ka jaka ha ka FIFA U17 World Cup Qatar 2026.
Kine ki long ki kynhun ba la bynta katkum ki Group:
Group A: Saudi Arabia (H), Tajikistan, Thailand, Myanmar
Group B: Japan, Indonesia, China PR, Qatar
Group C: Korea Republic, Yemen, Vietnam, United Arab Emirates
Group D: Uzbekistan, Australia, India, DPR Korea