Khliehriat, Naitung, 03: Arngut ki snar khaii drok ki la ngat ha ka shrip ba la pynap da ki Pulit ka East Jaiñtia Hills ha ka jammiet Sngi u Blei. Ïa kine ki arngut la tip kyrteng kum u Pynhoi Nongtdu, 35 snem ka rta na Pohshnong, Nartiang, West Jaiñtia Hills bad u Banteilang Mynsong, 23 snem ka rta na ka shnong Pdengshnong, Mawryng- kneng, East Khasi Hills.
Ki Pulit ka Umtyra Check Post, East Jaiñtia Hills District bad ka kynhun Anti-Narcotic Task Force (ANTF), East Jaiñtia Hills District hapoh ka jingïalam jong u Dy. SP u Bidhan Bhattacharjee tang shu ïoh ïa ka jingtip kaba bniah na ki tnat syntiat mar mar ki la pynlong ka jingpynap shrip bad ha ka janmiet sngi U Blei ha ka por kumba 6:00 janmiet ki la ïoh bat ïa kawei ka kali Maruti Dezire kaba don ïa u nombar ML 05-N 9889 kaba kit ïa u drok uba khia 326 gram.
Katkum ka jingtip kaba bniah jong ki Pulit la ong ba ïa une u drok la wanrah na ka thaiñ Silchar bad la thmu ban wanrah sha Shillong.
Ki Pulit ki la ïathuh ki nongniah jong ka kali Maruti Dezire ML05 N-9889 bad ka kali Maruti Dezire kaba don ïa u nombar AS 11 T-1645 tang shu ïohi ïa ïa ka jingkhynra jong ki Pulit ki la pyrshang ban phet bad ha ka jingbeh thong, ki Pulit ki la ïoh khang kdong tang ïa ka Maruti Dezire ML05 N-9889 bad ha ka jingkhynra la lap ba la kit ïa u drok.
Na ka met jong kine ki arngut, ki Pulit ki la ïoh kurup tylli ki Mobile Phone bad rah noh mardor sha thanat ban pynlong ïa ka jingtohkit kaba bniah.
Katba ïa kali kaba don ïa u nombar AS 11 T-1645 ki Pulit ki la lap ba la shu iehnoh ha kawei ka khlaw ha Byndihati bad hadien kane ki Pulit ki la rah noh ïa kane ka kali sha Khliehriat Police Station. Na kane ka kali ki Pulit ki la ïoh kurup 13 synduk ki sikret beaiñ kiba thmu ban khaïi be-aiñ bad mynta ki Pulit ki dang pynlong ka jingthwet kaba jur ban ïoh kem ïa kiba donkti.
Halor kane, ki Pulit ki la mudui ar tylli ki ejahar, kawei na ka bynta u Drok bad kawei pat na ka bynta bynta ki sikret beaiñ.
