Nongpoh, Nailar, 08: Ar ngut ki snar nongkhaïi drok ha ka sngi Palei ki la ngat ha ka jingpynap shrip jong ki Pulit ka Ri Bhoi hadien ba la ïoh ïa ka jingtip kaba bniah na ki tnat syntiat.
Ïa kine ki ar ngut kiba la shah kem ha ki Pulit ha ka por 3:45 baje noh sngi na kawei ka Petrol Pump ba don ka shnong Shangbangla, Ribhoi District la tip kyrteng kum u Peter Lamare bad u Vikash Masih na Punjabri Lane, East Khasi Hills, Shillong.
Na kine ki ar ngut, ki Pulit ki la ïoh ruh ban kurup ïa u drok Heroin uba khia 46.14 gram bad kine ki ar ngut ki la pyndonkam ruh da ka Scooty ban rah ïa u drok.
Ki Pulit jong ka Ri Bhoi ki la pynlong ïa ka jingtohkit kaba bniah bad register case ïa kine ki arngut hapoh ka NDPS Act bad ka jingbuddien ka dang ïaid shakhmat ban ïohkem sa ïa kiwei kiba donkti ha jingkhaïi drok.
