Shillong, Risaw 3: U Rikman G Momin mynta ka sngi Ba-ar, ula shimti kum u President ba thymmai jong ka Meghalaya Bharatiya Janata Party (BJP).
“Nga la shimti kum u President thymmai. Nga la pynkhreh ban pynkhlaiñ ïa ka party ha ka jingïatreilang ki nongtrei jong ka party lane ki karyakartas” la ong u Rikman.
Haba kylli kiei ki mat ba hakhmat eh kaba u don, u Rikman ula ong “Ka kamram jong nga ka dei ban pynkhlaiñ ïa ka party, ka kamram jong nga ka dei ban peit ïa ka party, lait nangta, sa kaei pat”.
U Rikman ula ong baka kam President ka dei kaba khia bha bad ula ong “Ngi don 2 ngut ki MLA. Ka dei ka jingïatreilang hynrei ka bhah jingïoh Vote jong ka Party ka la kiew bha bad ha ki snem ban wan, ngin pyrshang ban jop palat 2 tylli ki Seat”.
Ula ong ba ka Party ka dang ap ka jingbthah na ki nongïalam ba hakhmat eh na Delhi na ka bynta ban sdang ka jingpynkhreh haba ïadei bad ka ilekshon MP 2024.
Nalor kane u Rikman ula kam ba ka ka Party ka don ha ka jingmut jingpyrkhat jong ki paidbah bad dei namar kane ka Party ka don jingkyrmen namar u myntri rangbahduh ka ri u Narendra Modi u ïai trei shitom naka bynta ki briew ba duk.
Ula ong ba ka Party ha ka jingïalam jong u kan pynthikna ba ki paidbah ka Meghalaya ki ïoh lut ki jingmyntoi na ki skhim ba la bei tyngka da ka sorkar pdeng.
Nalor kane u president ba thymmai ka Meghalaya BJP u Rikman G Momin ula ong ba ka Party ka ïeng ban rat dyngkhong ïa ki kam bamsap bad na ka liang ka Party kan ïai bteng ban kren ïa ki mat halor ki kam bamsap pyrshah ïa ka sorkar synroplang ka Meghalaya Democratic Alliance (MDA).
“Haba ïadei bad ka MDA, ka dei ruh ka bynta jong ka Party bad lada don shisha ki kam bamsap, na ka liang ka BJP kan ïai bteng ban buh ki dak jingkylli namar ka don ka rynsan” ula ong.
U president barim ka Meghalaya BJP u bah Ernest Mawrie ula ong “Ka samoi treikam jong nga ka la kut bad kane ka jingkylliang president ka dei hapoh Meghalaya, Nagaland bad Puducherry.”
U bah Ernest ula ong ba ka dei ka nongrim jong ka Party ban bujli nongïalam lada ka samoi treikam ka la kut bad ula kyntait ruh ïa ka jingkynnoh don ki daw kaba la pynlong ïa ka Party ban weng ïa u.
Ula ong ba un ïai trei shitom na ka bynta ban pynkhlaiñ ïa ka Meghalaya BJP.
“Ngan ïai bteng kum u nongtrei ka BJP (Karyakarta). Ngan trei bad u president ba thymmai ha ryngkat bad ki MLA bad ka party. Ngin pynthikna kumno ban jop ha ki ilekshon” ong u bah Ernest.
U bah Ernest ula ong ba ka Party ka la rai ban nang pynkhlaiñ shuh shuh ïa ka Party kum shi bynta ban pynkhreh ïa ka ilekshon MP Lok Sabha.
“Ngi la rai ba mynta ka kynti ngi don jingthmu ban jop baroh 25 tylli ki Seats napoh ka thaiñ shatei lammihngi (North East). Ki don ki jylla kiba dei ki NEDA bad ki don ki jylla kiba synshar ka BJP. Ngi kwah ban jop lut ki Seat ban wanrah shuh shuh ki kam pynroi hapoh ka thaiñ shatei lammihngi (North East) baroh kawei” ula ong.
