Shillong, Nohprah 15 : U Nongïalam ka National People’s Party (NPP) uba dei ruh u Symbud Myntri Rangbah ka jylla u ma Sniawbhalang Dhar u la pynpaw ka jingkmen lada u Dr Mukul u wan ban pynïasoh sha ka Party da kaba ong ruh “ Ngan long u briew uba kmen tam lada u wan ban pynïasoh bad ngi”.
U Ma Sniawbha u la kynthoh kumne halor ka jingkylli hato ka dei ka jingshisha ba u Dr Mukul u lah ban rung sha ka NPP bad jubab ruh “ Ka dang kloi than ban ong ei ei” namar dang don por sa ar snem tam ban poi sha ka election.
Halor ka jingai jingkren jong u Dr Mukul ba ki don ki bor ba nalor jongka Congress kiba la hukum ïa u ba dei ban pynhiar shuki ïa u Ma Sniawbha bad ïa u bah Prestone Tynsong na ka kynhun myntri ha ka por ba u long kum u Myntri Rangbah katba synshar da ka Congress u ma Sniawbha u la ong kata ka shong ha ka rai jong kita ki nongïalam kiba halor namar ngi burom ïa ka rai jongki.
“ Nga burom ïa u Dr Mukul Sangma u dei uwei na ki Nongïalam hynrei ïa mynta ngam kwah ban ïa kyrtiang dien shuh sha ki por ba la leit” ong u ma Sniawbha da kaba ong artat haduh mynta ka jingïadei paralok ka dang ïai bteng “ Nga dei u paralok jongu bad u dei u paralok jong nga”.
