Shillong, Jylliew 05 : U Myntri Rangbah ka Jylla, Conrad K Sangma u la ong ba dei ban don ka lynti kumno ban weng ïa ka jingsngew ki paidbah haba ïadei bad ka jingrung kyrthlep ki mynder khnang ba kan plie lynti pat na ka bynta ka jingpyntreikam ïa ka lynti rel ha ka jylla.
Da kaba kyntait ban kren ei ei halor ka rai jong ki party liang pyrshah ban ym wan shim bynta ha ka jingïalang jong baroh ki seng sainpyrthei (all party committee) ka komiti ba la thaw da ka sorkar ban ïa kren halor ka ishu lynti rel, u Myntri Rangbah u la ong, “Ngam tip shuh, kaei ka jingmut jong ki. Hynrei na bynta jongngi ka thong ka long kaba shai bha.”
U Myntri Rangbah u la ong ruh ba naduh kaba sdang u la ieng beit ha ka nongrim ba ka lynti rel kadei na ka bynta ka jingmyntoi ki paidbah ba bun ha ka kamai kajih. U ong ruh ba kane kan ïarap na ka bynta ban pynkit ïa ki marbam, bad kiwei kiwei ki jait shabar ne shapoh ka jylla.
“Hynrei ki don pat ki jingsngew kiba shongnia kiba ki paidbah ki pynpaw la ka long halor ka ishu ka jingtalasi ïa ki mynder kaba dei kata ka mat kaba ktah eh,” u la ong.
Kumta, u la ong ba ki donkam ban wad ka lynti ban pynbeit ïa ka bad kane ka lah ban urlong tang lada baroh ki wan ban ïatai bad ïa syllok lang.
“Nga sngew ba kane ka long ka mat kaba donkam bha ban ïatai hynrei lada phim kwah ban ïatai, ngam don eiei shuh ban ong,” bynrap biang u Myntri Rangbah.
Katkum ka jingong jong u, ka jingïalang jong baroh ki party kan sa long shen.
