Ngam sngewphylla ïa ki jingkynnoh u Gogoi halor ka kam tih dewïong beaiñ ha ka jylla, Paul Lyngdoh

Shillong, Jymmang 31: U nongaiktien ka sorkar MDA bad u myntri ka sorkar u Bah Paul Lyngdoh u la ong ba um sngewphylla halor ki jingkynnoh kiba dangshen da ki kyrtong kiba khlaiñ tang na ka bynta ban ïoh bat ïa ka bor synshar ha Assam ha shwa ban pynlong ïa ki elekshon sha ka Assembly ha kane ka jylla ba marjan.
Ïa kane u la kynthoh ïa ka jingkylli halor ka jingkynnoh ba la pynpaw da u nongïalam ka Congress na Assam u Gaurav Gogoi ba ka kam tih dewïong beaiñ ka jur bha ha Assam bad Meghalaya kaba yn ym lah ban long khlem ka jingïada na ka sorkar pdeng bad kine ki sorkar jylla.
Kane ka jingkynthoh jong u Gogoi ka la wan ha une u bnai hadien ba ka Enforcement Directorate (ED) ka la pynlong ïa ka jingleit khynra ha ki 15 tylli ki jaka kiba don ha Jadigittim bad Nongalbibra kiba ha Meghalaya, nalor ka Jogighopa (Bongaigaon), Margherita (Tinsukia) bad Guwahati ha Assam, kum shi bynta na ka jingpyndonkam bakla ïa ka pisa kaba la tohkit kaba don ka jingïadei bad ka jingkynnoh ba ïadei bad ka kam tih dewïong beaiñ bad ka jingdon ki coke plant kiba la treikam ha Meghalaya.
“Ngam sngew phylla ïa kane namarba kane kadei ka por elekshon naba baroh kiba kwah ban don ha ka bor ha Assam kin kynthoh ïa baroh kine ki jingkynnoh. Kine ki jingkynnoh ki la wan beit na u Myntri Rangbah ka Assam pyrshah ïa u Gogoi bad ha kawei pat ka liang u la pynphai nia kylla pyrshah ïa u,” pynpaw u Bah Lyngdoh sha ki lad pathai khubor.
“Ka Meghalaya na ka bynta jong ki ka long tang ka kam jingïalehkai namar ki donkam ïano ïano ban ther bad ngi jia ryngkhat ba ngi dei ki para marjan bad ki kumta ngam sngew phylla hynrei phin sa ïohi hadien ki elekshon ka sur jong ki kan sa kylla,” u la bynrap.