Nongpoh, Nailar 23: Kawei ka trok kit Cement kala sahkut syndon ha surok Killing haduh ba ki kali kim lait shuh ban ïaid kaba la wanrah ruh ka jingdheng kali kaba jur, bad ka jingeh wat ïaki nongleit nongwan bad ki khynnah pule kiba pyndonkam ïa katei ka surok namar ka jingsniew jong ka surok naka jingleit ki trok kit khia bad kumjuh ka jingther u lapbah ha kine ki khyndiat sngi.
Haka jingther u lapbah hynnin ka sngi kala um kala khlong lut ïaki bynta jong u surok khamtam ha shuwa ban poi ka skulbah USTM haduh ba ka surok kala lah ktieh bad dap da ki thliew ki syar bad ki kali kim nud shuh ban ïaid namar ka jingsniew jong u surok haduh ba katei ka trok kala sahkut haki bynta jong utei u surok.
Kaba sngew sangsot shuh shuh ka long ba bun naki samla pule katei ka thaiñ kim poi shuh sha ki jaka pule bad hap ban leit phai biang shala iing namar ka jingdheng kali kaba jur bad ka jingktieh jong u surok.
Kum ban shu kdew hangne ba ka jingshna ïa utei u surok kam pat da slem hynrei namar ka jing bym biang jong ki nala bad kumjuh ruh ka jingïaid ki trok kit khia kala pynlong ïa utei u surok ban sniew biang tang katto katne por bad buh jingeh ïakiba bun ki paidbah nongleit nongwan bad kumjuh ruh ki samla pule.
