Shillong, Jylliew 16: Ka khubor ba la ïoh na ki pulit la ïathuh ba u wei u maji nongkinglieng, ula ïap ngam jyllop ha ka sngi Nyngkong ha Wah Umngot, Dawki, West Jaiñtia Hills katba u dang pynshong lieng ïa ki nongwan shangkai pyrthei.
La ïathuh ba kane ka jingjia ka la jia ha ka por 2:15 baje nohphaisngi. La ong ba ïa une u maji la tip kyrteng da u Amilson Surong ba na ka shnong Bakur.
Kat kum ka jingïathuh ki Pulit, u Amilson ula ïoh pang kynsan kynsan ha ka por ba u dang king ïa ka lieng ba shong ki nongwan shangkai bad kumta hi, ula hab shapoh ka wah bad ula ngam jyllop.
La ïathuh ruh ba la ïoh jingtip ba u Amilson u dei uba ju don ïa ka jingpang epilepsy.
Ha kaba ïadei bad kane na ka liang jong ka kynhun ki Pulit ha ryngkat bad ki pulit Fire & Emergency Service bad ki seng kinglieng ka thaiñ, kila pynlong ïa ka jingïa wad ïa une u maji bad lap ïa ka met ha ka por 5:36 baje janmiet.
Halor kane na ka liang jong ki bahaïing hasem kila kyrpad ïa ki bor ka aiñ ba kin pyllait noh ïa ka jingleh post mortem.
