Nongstoiñ, Risaw, 17: Uwei u rangbah briew ba la tip kyrteng kum u Balentin Lyngdoh Marshillong 53 snem ka rta na ka shnong Risiang, u la khlad noh hadien ba u la ngam jyllop hapoh ka Wah kaba don hapdeng jong ka shnong Risiang.
Katei ka jingjia ka la jia ha ka por kumba 8 baje mynmiet jong ka sngi Palei bad ïa ka met jong utei u rangbah, la lah ban sei noh napoh ka Wah hadien kumba ar kynta lyngba ka jingïarap ka kynhun Search and Rescue Team (S&RT) ka tnat Fire and Emergency Service na Nongstoiñ.
Katkum ka jingïathuh u Sordar ka Shnong Risiang, la ong ba u tei u rangbah hadien ba u la ïa shongkai bad ki para shnong, u la leit sha katei ka wah da ka jingthmu ban sait kti. Hynrei ha katei ka por u la kum hap harud wah bad la ong ba u la ngam kai noh ha um bad kam ruh sha shilliang ka wah, namar la ong ba ka um ka la kham jyndong ha kata ka jaka. Ki la don ruh ki khun jong u kiba ïohi bad ki la pyrshang ban leit tan ïa u hynrei u la ong ym lei lei un sum shwa.
Hadien katto katne por kynsan ki la shu ïohi ïa utei u rangbah ba u la ngam jyllop noh katba u dang ngam sha shilliang ka wah.
Mar kumta hi ki khun jong u ki la leit ngam ha katei ka wah ban wad ïa u bad la ong ruh ba ha katei ka jaka ba u ngam, kam da dei kaba jylliew hynrei ki khlem lap satia bad ka la don ruh ka jingïapyrshang wad da ki paidbah nongshong shnong, pynban khlem ïoh ne lap satia bad dei tad hadien ynda la wan poi ka kynhun SRT la lah ban sei noh ïa ka met napoh ka Wah.
