Shillong, Naitung 08 : Arngut ki Khynnah ba dang hapoh 11 snem, kila iap jyllop ha kawei ka pung ba dang shu tih thymmai hapoh ka shnong Sohmynting, kaba jngai kumba 12 Km na Jowai, West Jaintia Hills.Kine ki arngut ki khynnah ki kyrteng u Sambud Suting ba 10 snem bad u Armanki Suting ba 11 snem.
Kat kum ka khubor Pulit, la ïathuh ba saw ngut ki khynnah kila ïaleit sha katei ka jaka hynrei arngut na ki khynnah kiba iap, kila kynthih shapoh ka pung ban ïajngi katba arngut kila sum harud.
Ki ïathuh ba ki arngut kiba don harud ka pung, haba ïohi ba kine ki arngut kiba kynthih kim shym la mih shuh sha sla um, kila leit ban pyntip sha ki briew ba don marjan kiba la wan ban pyrshang pyllait ïa kine ki arngut hynrei kim shym la lapdien satia ïa ki.
La ïathuh ba ïa ki metiap la lap hadien bala pynrngat ïa ka um na pung da kaba pyndonkam ïa ka puh shilum.
