Shillong, Nailur 24 : I Mei-ieid Kmoin Wahlang i nongmareh thong ba la 76 snem ka rta i la ïathuh ba im ju thait satia haba i shim bynta ha kino kino ki jingïakob mareh tangba im lah pat ban mareh stet kum kiwei pat ynda la jan poi sha ka kylla kaba khatduh.
Haba kren bad u Mawphor hadien ba i la dep ban mareh ïa ka jingïakob mareh ba 10 kilometer ha ka Sohra International Half Marathon kaba long ha kane ka sngi Saitjaiñ ba la dep ha Sohra, ine i Mei-ieid i la ïathuh ba ka daw kaba pynlong ïa i ban ym lah ban mareh bha ha katei ka lympung kadei namar ba i khlem ïoh thiah bha bad namar ki la hap ban mih dang step namar ba i hap ban ïalam bun ngut bha ki nongmareh kiba wan na ka thaiñ ryngkat bad i.
“Nga khlem ïohlad ban thiah bha. Dei na kane ka daw ngam shym la lah ban mareh bha,” i la ong haba kren bad u Mawphor ha shwa ban pynbna ïa ka thup kyrteng jong ki nongjop.
I Mei-ieid Kmoin iba mareh ha ka thup kiba 60 snem shajrong, mynta wat ha ka rta kaba 76 snem hynrei i dang lah pat ban wan haduh ka kyrdan kaba san ha ka jingiakob mareh kiba 10kilometer. I la lah ban pyndep ïa ka thong ha ki 56minit bad 48 sekhon. Lada phai sha ki nongjop ha ka kyrdan ba nyngkong, i Mei-ieid Rolinda Wanniang i la pyndep ïa ka thong ha ki 51minit bad 52 sekhon, bud sa i Mei-ieid Snora Rani ha ki 53minit bad 09 sekhon, katba ïa ka kyrdan kaba lai la ïoh da i mei-ieid Klara Marweiñ ha ki 53minit bad 10 sekhon, bad ïa ka kyrdan kaba saw pat laïoh da i mei-ieid Thingda Wanniang iba pyndep ïa ka thong ha ki 53 minit bad 44 sekhon.
Lah ban ong ba wat ha ka rta kaba 76 snem, hynrei la ïohi pat ba ka rukom mareh jong i ka long thik kum kito ki longkmie ba don ha ka thup kiba 50 – 60 snem bad kane ka paw ruh wat ka por ba i shim ban pyndep ïa ka thong ruh ka dang ïajan ïa jan bad tam ruh ïa kito kiba mareh ha ka thup kiba 50-60 snem ruh. Kiba bun ki nongmareh kynthup ïa kito ki nongmareh ba pawnam na kylleng ki bynta jong ka Ri ki la ïaroh ïa kane ka jinglah jong i.
La sakhi ruh ba mar ïa dep mareh ma i ha kane ka sngi, kibabun ki nongmareh la ka long naduh ki samla kynthei bad shynrang kynthup wat ïa ki ophisar ka sorkar jylla, ki la ïa leit ban khublei kti bad kdup ïa ine i mei-ieid.
Kumban shu kdew hangne, i ne i mei-ieid i la shah khot ban leit shim bynta lang bad ka kynhun India sha ka Pan Pacific Master Games 2024, kaban long ha u Naiwieng ha Queensland, Australia.
Kane ka jingshah jied jong i ka la jia hadien ba i la lah ban ïalehkai bha ha ka lympung ïakop mareh kaba long ha Hyderabad mynta u snem hi.
Haba kren pat halor ka jingpynkhreh na bynta ka lympung ïalehkai kaban long ha Australia, i Mei-ieid Kmoin i la ïathuh ba man ka step i la pynkhreh na bynta katei ka lympung kaba heh tam namar i kwah ba ka jingleit jong i sha katei ka ri kan long kaba seisoh bad kan long ruh ka burom ym tang ïa ka Jylla hynrei ïa ka Ri hi baroh kawei.
Ha kane ka jingïakop-mareh ba pawnam ha ka jylla ba tip kum ka Sohra International Half Marathon, kaba long ha ka Sngi Saitjaiñ la sakhi ba ki don haduh palat 7200 ngut ei ei ki nongmareh na kylleng ki bynta jong ka Ri India bad na shabar ri ruh kumjuh.
ïa kane ka lympung la lah ban pynlong da ka jingiatrei lang hapdeng ka Meghalaya State Olympic Association, ka Meghalaya Athletics Association ryngkat ka jingkyrshan na ka tnat Sports jong ka Sorkar Jylla Meghalaya, nalor ki nongïalam shnong na kylleng ki bynta jong ka thaiñ Sohra.
