Ngam ju heh nia sha madan madiah nga trei da ka kam ban myntoi ki paidbah – Bah Sanbor Shullai

Shillong, Lber 28 : Ka Shillong South constituency ha ka sngi Saitjain ka la ïoh haduh artylli ki cultural centre kiba kot sha ka 4.09 klur tyngka, kata kawei ha Kynjat Phutbol bad kawei pat ha Madan Laban – Riat Laban.
Ïa kine ki cultural centre kiban donlang ruh naduh ki Ïing Dorbar, ki ophis treikam jong ka shnong, jong ka Seng Samla, Sports Club, Seng Kynthei bad kiwei kiwei la buh mawnongrim da u MLA ka thain ba dei ruh u Myntri Sorkar ka jylla Bah Sanbor Shullai.
Na ka liang u Bah Sanbor Shullai haba kren ha ka jingïalang u la ïathuh ba ïa ka cultural centre ha Kynjat Phutbol la tei ha ka jinglut kaba 2.05 klur tyngka katba ïa ka centre ha Madan Laban pat la mang ban tei ha ka jinglut kaba 2.03 klur tyngka.
Haba kren ha ka jingïalang kaba donlang naduh ki nongïalam shnong, ki engineer bad ki paidbah u Bah Sanbor u la ong ba um ju sngewtynnad ban shu heh nia sha madan madiah hynrei u pynlut por na ka bynta ban wanrah ïa ki kam pynroi kiba dei na ka bynta ka jingmyntoi jong ki nongshong shnong.
“Ïa ki ki Cultural Centre ban shna mynta kin don naduh ki hall katkum ka juk mynta, ki kamra heh kiban don ki jaka leit bar kiba biang bad kiba khuid, ki conference room ban shong jingialang, ki ophis treikam jong ka Dorbar Shnong, jong ka Seng Kynthei, Sports Club, ki Seng Samla bad kiwei kiwei,” ong u Bah Sanbor.
Shuh shuh u ong ba kin don ruh wat ki jaka ïalehkai kaba heh ha kaba kan long ruh ban pyndonkam kum ka jaka lehkmen haba don ki jingrakhe Khristmas bad kiwei kiwei.
U MLA u la ong ba ynda la dep, kine ki Centre kin long ruh kum ki jaka ban ai jinghikai halor ka koit ka khiah ne kino kino ki jingïalang kiba ïadei bad ka bit ka biang jong ki paidbah.
Ha kajuh ka por u la kyntu ïa ki nongïalam shnong bad ki paidbah ba kin ai ka jingïatrei lang khnang ba ka jingpyntrei ïa kine ki projek kin dep ha ka por kaba biang bad ba ka jingtrei ruh kan long kaba paka bad skhem.
Ha kane ka sngi na ka liang ki Rangbah Shnong kynthup naduh u Rangbah Shnong ka Kynjatphutbol Bah Shaiphar Wahlang bad kumjuh u Rangbah Shnong ka Madan Laban – Riat Laban Bah Iostar Sunn, ki la pynpaw ka jingsngewnguh ïa ka jingïohi jngai jong u MLA na ka bynta ka jingdonkam jong ki Dorbar Shnong.