Shillong, Nohprah 04: Haba pynkut ïa baroh ki jingmut dur, u nongïalam ka AITC bad u Myntri Rangbah barim ka jylla u Mukul Sangma ha ka sngi Balang u la ong ba kam shym don kano kano ka jingkylli ïa u ba un leit phai biang sha ka seng Congress naba kane ka seng ka ïatreilang bad ka National People’s Party (NPP) kaba la ïalam ïa ka sorkar MDA.
Katkum ka jingong jong u, ula ong ba mynta u dang ïakhun ïa kane ka sorkar kaba ym don ka jingkitkhlieh bad ka roi ka san jong ka jylla hi baroh kawei.
Ha kaba ïadei bad kane haba kren sha ki lad pathai khubor, u Sangma u la ong, “Phi kylli ïa nga lano ngan leit phai biang sha ka seng Congress? Hynrei ka Congress ruh ka don lang bad ki. Kane kam dei ka jingshisha? Hato ka Congress kam don bad ka NPP?” Haba phi phai sha ka district council. Kumta phi kren shaphang ka Congress ha Meghalaya, kaba ym don pura ka jingkdew kaba biang. Lada ki don ïa ka jingbthah kaba biang ki dei ban tip la ka long kaba biang ba kin pynïadei bad ka NPP ne kumno. Ki kren shaphang ki kam paidbah hynrei sha lyndet ki ïatreilang.”
“Kumta u Dr Mukul Sangma u la pynkut noh ïa kane ka jingmut dur naba ngam lah ban pynkylla ïa ka jingmut jong nga, ka rai jong nga ban shakri ïa ki paidbah, ban tei ïa ka jylla ha kata ka rukom kaba biang bad ban pynurlong ïa ka jingphoh sniew jong ki nongshong shnong,” u la bynrap.
Haba kylli, u Sangma u la ong ba kane ka rai ban ym leit phai biang sha ka Congress kam don jingïadei bad ka kam shimet pyrshah ïa u Bah Vincent H Pala.
“Kane kam dei satia ka kam shimet. Ngan ym lah ban ïeng halor kane ka nongrim. Kane kam dei ka kam jong nga. Kane ruh kam dei ka jingai jingmut jong nga. Kane ka jingeh kaba kyllaiñ. Lada phi phai sha kaei kaba nga la ong ha ki snem ba la dep, ha kaba kane kam dei ban ïaid katkum ka jingkwah kaba shimet. Namar kata phi ïakhun pyrshah ïa ka Congress kaba ïatreilang bad ka NPP. Kumta shano ngan leit? Hato nga donkam ïa ka Congress na ka bynta ban shakri ïa ki paidbah? Nga la sdang ïa kane ka kam kum u MLA. Ngam don ïa u godfather ha kane ka kam saiñ hima sima. Nga don tang ïa ki briew kiba sam lem ïa ki juh ki jingmut jingpyrkhat kiba kloi ban ïakhun bad nga naba ngam ju ngeit ïa ki lynti kiba lyngkot,” u la ong.
Na ka liang jong u, u la ong ba kane ka sorkar ba la ïalam da ka NPP kam shym la lah ban pynurlong ïa ki kam kiba la leh da ka sorkar jong u ha ki snem ba la leit.
“Nga ju phai barabor sha ki kam kiba ngi la buh ha ki snem ba la leit bad balei ngi kren ïa kine naba ngi donkam ïa ka sorkar kaba don ka jingkitkhlieh ban shakri ïa ki paidbah ha ka lynti kaba dei khamtam ha kane ka ri synshar paidbah. Kane ka sorkar kaba mynta kam shym la lah ban leh ïa kaei kaba la angnud da ki paidbah nongshong shnong,” kynnoh u Dr. Mukul.
Haba ong ba ka jingïakhun jong u ka long pyrshah ïa kane ka sorkar ba la ïalam da ka NPP ha ka jylla u Sangma u la ong, “Nga ïakhun ïa kane ka sorkar naba kadei ka kam kaba nga la ïoh ka jingshaniah na ki nongshong shnong jong kane ka jylla. Namar kata nga don ka jingkitkhlieh ban ïada ïa ka bha ka miat jong ki nongshong shnong ka jylla bad ban tei ïa ka lawei kaba don ka jingkitkhlieh.”
U la kynnoh ruh ba baroh ki rukom treikam kane ka sorkar ka la long tang hapdeng ki khyndiat ngut kiba la jied kyrpang.
“Shim ïa ka thup kyrteng kiba treikam lajong kylli ïa ki la ki ïoh kajuh ka lad kumba long lem kiwei ïa mynta. Kam long kumta naba ïa ki project kiba heh la ai lad tang ïa ki katto katne bad ki briew kiba rit kim lah ban ïoh bynta. Hato phi pyrkhat ba kiba seng kam la jong na Khasi bad Jaiñtia Hills kin dei ki businessmen ba heh,” ong u Sangma da kaba bynrap, “Kane kadei ka kam kaba pyndkoh ïa ki jingtreikam jong ki nongseng kam la jong bad ki nongkhaïi jong ka jylla ba kin kamai jakpoh. Kane kadei kaei kaba la jia.”
Ha kawei pat ka liang u Sangma u la kyntait ba u don ka jingthmu ban shna noh ïa la ka jong ka seng saiñ pyrthei jong u ha kane ka jylla.
