Shillong, Nailar 30 : U Myntri Rangbah ka Jylla Conrad K Sangma ha ka sngi Saitjain u la pynlong ïa ka jingïalang ha Don Bosco College Higher Secondary Section Hall, Tura, na ka bynta ka shnong Sampalgre kaba hap lang ha ka 51 South Tura Constituency. Ïa kaneka jingïalang la tip ruh kum ka ‘Krimko Ja’ku De’na’.
Haba kren ha ka jingïalang, u Myntri Rangbah u la ong ba ka jingwan jong u ha kane ka sngi kam dei satia kum u Myntri Rangbah hynrei kum u MLA jong ka South Tura constituency ban ïa kren bad tip ïa kiba bun ki ishu kaba ki paidbah ki kynduh.
“Mynta ka sngi nga wan shane ym kum u Myntri Rangbah ka Jylla hynrei kum u MLA jongphi ban ïoh sngew bad sngap ïa kaei kaba phi don ban ong. Ngi don ka prokram CM Connect hynrei ka prokram mynta ka sngi ka long kum ka prokram MLA Connect.”
Ïa kane u la kren ha shwa ba un ïa kynduh pat bad ki nongïalam na ki shnong bapher bapher kiba hap ha ka South Tura constituency.
Na ka liang u Myntri Rangbah u la kular ruh ha ka jingïalang ba ïa ki ishu bad ki jingeh ba ki paidbah ki kynduh u la dep ban sngap bad ruh ban shimkhia mardor.
Ki nongïalam bad ki nongshong shnong kiba poi sha kane ka jingïalang ki kynthup ruh naduh Rengmal Gittim, Akimdora, Bolsal A’chik, Srop Gittim, Ranggira, Leper Colony, Kongbe A’kong, Lower Wadanang, Kasinang and Niram A’ding Danak Kongbe ha kaba ki la pynpaw bad rah ruh ïa ki ishu kiba ïadei bad ka bha ka miat bad ka jingdonkam jong ki paidbah ka thain.
