Shillong Nohprah 21: U MLA ka 19th South Shillong constituency bad u Myntri ka tnat Arts and Culture u Bah Sanbor Shullai u la ong ba kum u MLA bad u Myntri sorkar u kwah ban pynpaw sha ki paidbah ba u kwah ban kren duna hynrei ban pynbun pat ïa ka kam.
Ha kane ka sngi na ka liang jong u MLA bad u Myntri sorkar u la ong ba un trei kum ka submarine ka ban treikam napoh napoh khlem da pynbna paidbah ïa ki kam kiba u la trei.
Ïa kane u la kren ha ka jingïalang buh mawnongrim ïa ki 2 tylli ki surok ha Kench’s Trace bad ha Kynjat phutbol.
U Bah Sanbor Shullai u la ong ba u pynduna ïa ka jingpynheh tyngam ban kren sha ki ïew ki hat kumba kren kiwei.
U la ong ruh ba ki seng samla, ki seng Kynthei bad ki dorbar shnong kim donkam ban pynlong ki jingïakhih ne ban shah thngan ban dawa surok kumba long ha kiwei pat ki jaka.
Ha kane kasngi na ka liang jong u MLA bad Myntri sorkar jylla u la kyntu ïa ki paidbah ba kim dei ban shet kylla ïa kiba leh bha bad da lei lei ruh kim dei ban shet kylla ia kiba la lehj bha.
“Baroh ki kot Bakhuid ki hikai badei ban burom ïa kiba lehbha bad ba ym dei ban shet kylla bad dei ban burom ïa ka jingïathuh jong ka Bible,” ong u Bah Sanbor Shullai.
Ha kane ka sngi la ïadonlang ki nongïalam shnong jong ki ar tylli ki shnong bad kumjuh ruh ki paidbah jong ki shnong kiba la wan ban ïa shim bynta ha kine ki prokram.
