Nga tip ïa ka jingeh ki nongrep namar nga ruh nga la dei teng u nongrep : Agriculture Minister

Shillong, Risaw 04 : U Myntri ka tnad Kam Rep ka sokar jylla, u Timothy D Shira ha ka sngi Thohdieng u la plie paidbah ïa ka jingrejistar online ne ka Online Registration Membership Form jong ka National People’s Party Farmers Front (NPFF) ha ka jingïalang kaba long ha Conference Hall jongka party.
Ïa kane u Myntri u la plie paidbah ha ka jingïalang jong ka NPFF State Executive Committee kaba ki nongmihkhmat jong ka NPFF na kylleng ki distrik ki la wan ban shim bynta ha ka jingïalang kaba nyngkong eh markhmat bad u Myntri ka tnad ka Rep ka Riang ka sorkar jylla.
Ha kane prokram, ki nongïalam na kylleng ki distrik ki la ïoh ruh ïa ka lad ban ïathuh ne pynsngew markhmat ha u Myntri ïa ka jingeh kaba ki nongrep na ki distrik jong ki kynthup lang naduh rilum Garo bad kumjuh ruh na rilum Khasi bad Jaintia.
Na ka liang u Kongsan ha ka jingkren u la pynpaw ïa ka jingsngewkmen kaba khraw ba u la ïoh ïa ka lad ban ïa kynduh mar khmat bad ki nongkitkam jong ka NPFF kiba la wan na kylleng ki district jong ka jylla Meghalaya.
U la ong ruh ba kum u Myntri u sngewthuh lut ïa ka jingeh ki nongrep namar kane kadei ka tnad kaba ïar bha kaba jan baroh ki nong shong shnong ka jylla ki imja bad pynheh pynsan bad pynnang pynstad ïa ki khun da kaba rep.
Nangta u ong ruh ba watla u shimti kum u nongmihkhmat bad mynta kum u Myntri hynrei um lah pat ban klet ba ïalade ruh u la long teng u nongrep. “Kumta nga don ka jingtip kaba bniah halor ka rep ka riang bad kumta da ka jingïatrei lang ngin sa lah ban weng ïa kiba bun ki jingeh kiba kum ki nongrep ngi ïa kynduh,” u la ong.
Ha kawei pat ka liang u Myntri u la pynpaw ruh ïa ka jingbynniaw halor ka jingjur ka jingïap tram jong u kwai bad kiwei kiwei ki mar rep kiba la ktah haduh katta katta ïa ka rep ka riang jong ki paidbah ka jylla kiba ju ap kamai na une u mar rep.
Kum u Myntri, u la kyntu ïa ki baroh ki President jong ki distrik bapher bapher bad ruh ïa ki nongkit kam ha ki block bapher bapher ba kin leit sha ki paidbah nongrep ban pynshai bad pynsngewthuh ha kaba ïadei bad ka rep ka riang. U la bthah ruh ïa ki ban pynsngewthuh ïa ki paidbah nongrep ban pynrung kyrteng ïa lade sha ka NPP Farmers Front . Haba bynrap lang u Chairman ka NPFF u Bah Himalaya M Shangpliang u la ong ki nongkitkam ka NPFF naduh ki District President bad ki nongïalam na ki Block ki long kiba donbok ba kin ïoh ïa kynduh ïa u Myntri Sorkar ba peit ïa ka tnad ka rep ka riang namar ba u dei uba la shemphang bha ha ka kam rep.
Halor ka jingthaw ïa ka NPFF, u Bah Shangpliang u la ai khublei ïa u State President jong ka National People Party u Bah Prestone bad kumjuh ruh ïa u Conrad K Sangma uba dei u National President kiba la ai mynsiem ban ïaid sha khmat ban pynïar ïa ka rukom trei kam jong ka NPFF.
“Hapoh ka jylla Meghalaya dei tang ka NPP kaba don la ka jong ka shnat trei kam ka ban peit kyrpang ïa ki nongrep, katba kiwei kiwei ki seng sain pyrthei kim ju don,” u la ong.
Ha kaba ïadei bad kane ka Online Registration Membership Form u Bah Shangpliang u la ïathuh ba ki nongrep kiban pynrung ïa lade sha ka front kin dei kiba la tikna bad kiba dei hok.
U la ïathuh ruh haduh mynta ki la dep ban thaw lut ïa ki shnat treikam jong ka Farmers Fronts ha baroh ki 12 tylli ki distrik. Katba ha ki block/constituency pat na ki 60 tylli haduh mynta ki la dep ban thaw tnad ha ki 36 tylli bad ïa ki 24 tylli pat ki buh thong ban pyndep noh mynta u bnai hi.