Nga rung sha ka NPP namar nga ïohi ïa ki kam pynroi ba kane ka sorkar MDA ka trei: Ronnie

Shillong, Nailar 5 : U MLA jongka Congress na ka Mylliem Constituency u bah Ronnie V Lyngdoh u la ong ba ka jingrai jongu ban pynïasoh sha ka National Peoples’ Party (NPP) ka dei halor ka nongrim ba u ïohi ba kane ka party ka phai khmat sha ki kam pynroi pynpar bad ka jinglah jong ki nongïalam jongka ban trei da ka kam.
U la ïaroh ïa u Myntri Rangbah ka jylla bad ïa ki thong treikam ka party kiba thew sha ka jingkylla kaba khraw ha ka jylla.
U la ïathuh ba ka jingrai jongu ban rung sha ka NPP kam dei kaba mar mar hynrei ka dei hadien ba la sngap ïa ka jingpynbor jong ki paidbah ka Mylliem Constituency kiba kyntu ïa u ban shim ïa ka rai rangbah na ka bynta ka roi ka par ha ka constituency.
U la ïathuh kam don kano kano ka jingbuh kyndon, jingïateh, ïa tyrwa ha kaba ïadei bad ka jingrung jongu sha ka NPP. U la ïathuh ba ka jingrung jongu ka long ban ïatrei lang na ka bynta ka roi ka par hapoh ka jylla ym ban shu heh tang ka tyngam.
“ Ha kaba ïadei bad nga kane ka jingrung sha ka NPP ka dei ka jingaibor jong ki paidbah namar khlem ka jingaibor jong u paidbah ngan ym shim ïa kane ka sien jam. Nga kwah ruh ba pynshai ba kam don kano kano ka jingïateh, jingbuh kyndon ne jingtyrwa ha kaba ïadei bad kane ka jingrung jong nga sha ka party. Nga rung namar nga ruh nga kwah ban trei ym ban shu ïa heh tang ka tyngam” ong u bah Ronnie.
Ha kaba ïadei bad ka roi ka par hapoh kane ka sorkar MDA ba la ïalam da ka NPP u la ong “ Kane kein kaba pynlong ïa nga ban rung sha ka NPP ban ïatrei lang bad u Myntri Rangbah uba kren kham jam ka kam ban ïa ka ktien. Ngi don ki nongïalam kiba jur tang ka ktien hynrei mynta ngi don u nongïalam uba kren kham jam ka kam ban ïa ka ktien”
U la ai nuksa ïa ki jingtreikam jongka sorkar ba ïalam ka NPP kynthup ïa ka 240 klur tyngka ba la pynbna mynta ka sngi ban pynkhlaiñ ïa ka jingrep syntiew ha ka jylla.
U kyntu ïa u Symbud Myntri Rangbah ka jylla u bah Prestone Tynsong ban pynsted ka jingtrei ïa ka surok na Lawsohtun khnang ban lait na ka jingdheng kali kaba jur. “ Ngi donkam ki nongïalam kum u Myntri Rangbah bad Symbud Myntri Rangbah.Nga la ju rah bunsien ïa ki mat kum ka surok namar ki paidbah ki la mad jingeh da shisha bad u bah Prestone u sngap beit barobor kumta nga kyrpad ba un sngewbha ban pynsted ïa kane ka surok na Lawsohtun ruh.
“ Kine kein ki dei ki nongïalam kiba ngi donkam namar ki trei ka kam bad pynduna ka ktien namar ki kwah ban shakri ïa ki paidbah bad ki paidbah ki da ïoh shisha ki nongïalam kiba tbit kiba pynlong ruh ïa nga ban pynïasoh shaka NPP. Nga ïohi hapoh ka jingïalam kane ka party ka jylla jong ngi kan roi kan par bad kan wanrah ka jingkylla kaban ïaineh junom” ong u bah Ronnie bad u kular ruh ban ïatrei lang bad ka NPP ban wanrah ka jingroi jingpar bad jingkylla ha ka Mylliem Constituency baroh kawei.