Nga pang ka dohnud, ngam kwah shuh ban phai dien ïa kaba jia shwa u 2018 : Bah Metbah

Shillong, Jylliew 13 : U President Rangbah ka UDP, Bah Metbah Lyngdoh ha ka sngi Nyngkong u la ong ba um kwah shuh ban phai dien lane wat tang ban kynmaw ïa kaei kaba la jia ha shwa ka elekshon 2018 kaba la poi haduh u pud ba u Bah Remington Pyngrope un hap ban leit ïakhun noh na kawei ka party kaba dei ka NPP.
“Ngam kwah ban phai shuh balei ka jia kumta, kaba la leit ka la leit, ngam kwah shuh tang ban kynmaw ruh namar nga pang ka dohnud. Haba nga peit ïa ka politik ha ka jylla nga ïohi ba ka don shibun ka jingpynbiej ïa ki paidbah kiba lui lui kiba shisur kiba shida,” ong u Bah Metbah ba dei ruh u Lamphang jong ka Iing Dorbar Thawaiñ ka jylla ha ka jingpdiang burom biang ïa u Bah Reming kaba long ha Maw-u-Sam.
Da kaba ai khublei ïa ki paidbah ba bun kiba la poi sha katei ka jingïalang ban pynïasoh biang sha ka UDP sa shisien pat ryngkat bad u Bah Reming, na ka liang u President u la ong, “Ngim wan tang ban pynshongshit kai ïa phi ki paidbah baieit.”
U Bah Metbah u la ong ba kum u MLA uba jop ryngkat bad u Bah Reming ha u 2008 u ïohi ba udei uwei na ki MLA ba don ka jingïadei kaba jan tam bad ki paidbah ka constituency bad kane ka pynlong ïa ki paidbah ba kin nud beit ban phone ïa u ha kano kano ka por ruh.
“Paidbah Mawkynrew nga kwah ba phin neh skhem namar ka elekshon nangne shakhmat kin don shibun ki jingtynjuh ïaphi kiba lui lui. Kynmaw wat bakla namar kane kadei ka sngi kaban pynsah kynmaw ïa ka Mawkynrew constituency ha u 2023,” u la bynrap biang.
Nalorkata, u ong ruh ba ha u 2018 ki la jop 6 ngut ki MLA hynrei dei da ka jingjop ha ki elekshon shiteng samoi ba ka party ka la kiew sha ka 8 ngut kynthup ïa ka Shella constituency ba la mih bujli da u khun jong u Dr. Donkupar Roy, u Balajied Synrem.
“Ngi donkam bun ngut ki MLA namar tang 8ngut kam pat biang satia. Hynrei ka rai ka shong ha ki paidbah, hato kin ai lad ïa ka UDP ban synshar marwei ha u 2023. Hangne hi, ngam artatien shuh ba phin ai ïa ka jubab kaba sngewtynnad,” u la ong.