Nga ngeit skhem ba ka SIT kan lah beit ban tohkit halor ka jingjia ïa ki shijur ym pat i donkam aiti sha ka CBI : Paul

Shillong, Jylliew 7 : U Myntri ka tnad kam jngohkai pyrthei ka jylla uba dei ruh u Nongpathai khubor ka sorkar u bah Paul Lyngdoh ula pynpaw ka jingsngewthikna bad ngeit skhem ba ka Special Investigation Team (SIT) kaba la thung ban tohkit bniah halor ka jingjia ïa ki shijur ki nong Indore ha ki thaiñ Sohra kan lah beit ban ban tohkit bad lap dien halor kane ka jingjia bad kumba long haduh mynta hi um pat i donkam ban aiti ïa ka jingtohkit sha ka CBI.
Haba jubab ïa ka jingkylli jongkawei ka nongpathai khubor na Assam u bah Paul u la ong “ Kaba nga kwah ban ong ka long ailad ïa ka SIT ba kan tohkit bniah bad nga ngeit skhem hi ruh ba ngi don ka DGP kaba la tbit bha kaba la shakri bun bun snem ha ki tnad tohkit ka sorkar pdeng ha Delhi bad kumjuh ruh u SP ka East Khasi Hills uba dei u IPS bad ki long ki ophisar kiba tbit bha bad kam don jingartatien ba kin lah beit bad lap dien halor ka jingjia la ka long ha kano kano ka rukom ruh”.
U la ong ba tang kawei ba u kwah ban pynpaw sha ka pyrthei ba ka sorkar kan ym ïada ïa kino kino ruh ki nongleh bymman la ki dei kiba napoh ka jylla ne kiba na shabar ka jylla ruh kiba leh halor ka jingiap jong u Raja Raghuvanshi bad ka kurim jong u ka Sonam kaba dang jah rngai haduh mynta.
Halor ka jingkylli kumno u sngew halor ka jingdawa jong kiba haïing ban aiti tohkit sha ka CBI u bah Paul u la ong “ Nga tharai to ngin ïai shwa kyndon pa kyndon. Namar hadien ka jingtohkit ki pulit la thung mynta da ka kynhun tohkit kaba kyrpang ka SIT bad ki Pulit ka jylla ki dei kiba la bna nam bha na ki kam kiba ki la pyndep mynshwa kumta ïa mynta hi ailad ïa ka SIT ban leh ïa kaba donkam bad ym pat i donkam ban aiti sha ka CBI”.
“ Hynrei lada jia ba hadien ka jingtohkit ka SIT kam lap dien ei ei ngin sa shim da kawei pat ka sien jam namar ngin ym ïada ne uno uno u nongleh kam sniew la ka dei napoh ka jylla ne na shabar ka jylla ruh.
U bah Paul u la ong ruh ba ka long kaei kaei kaba sngewsih halor kane ka jingjia kaba kham khyllah namar ka thaiñ Sohra ne ka Cherrapunjee kam pat ju mad ïa kaba kum kane ka jingjia na ka bynta ki nongwan jngohkai da ki phew phew snem mynta ba ka long ka jaka kaba khring bha ïa ki nongwan jngohkai.
“ Ka long kaei kaei kaba pynkyndit bad ngi sngewlem ruh ïa kaei kaba la jia ïa u Raja bad nga kwah ruh ban kdew ba ki nongshong shnong jongka Meghalaya khamtam ha ka thaiñ Sohra kaba dei ka jaka jngohkai ba khring tam ïa ki nongwan jngohkai, ki briew ki dei kiba kloi ban pdiang daka jingphuh sam rkhie ïa ki nongwan jngohkai. Ym pat ju don uwei ruh u nongwan jngohkai uban shah shoh bad wat mynta hadien kane ka jingjia ruh ki nongwan jngohkai ki dang wan tuid beit sha thaiñ Sohra”.
“ Hadien ka jingjia ngi dang pyrkhat ba ki briew kin phet krad na thaiñ Sohra hynrei ka long mar khongpong bad u la ong ruh ïa ka nongpathai khubor ba phi ruh phi la leit da lade sha Sohra bad phi la ïohi da la ki jong ki khmat ba da ki hajar ngut ki nongwan jngohkai ki ïai tuid sha thaiñ Sohra, namar ym don kiba kwah ban kynjat ïa ka pliang ja kaba bsa bad pyndap bam ïa ki” ong u bah Paul.
Kumjuh ruh phin ym ïohi ïa ki trai shnong ba ki buaid tanglang ne ki leh khlem akor ïa kiba wan jngohkai sha kane ka jylla khamtam sha ki thaiñ Sohra.