Shillong, Nohprah 03: U Myntri Rangbah barim ka jylla bad u nongïalam ka TMC u Mukul Sangma u la kyntait ïa ka jingthmu ban leit pynïasoh biang sha ka Congress party, na ka bynta ka bha ka miat ki paidbah ka Meghalaya ka la bujli ïa baroh.
Haba kren shaphang u Zenith Sangma ba shim ka rai ban pynïasoh biang sha ka Congress, u Mukul u la ong, “Phi la kren shaphang ka kam kaba kthang. Mynta ka bha ka miat jong ki paidbah ha ka jylla ka la bujli ïa baroh. Ki la bujli ruh ïa ka jingsngewbha ha kano kano ka political party, ne kano kano ka jingtreikam jong ka political.”
U Mukul u banjur ba ka rai jong u ban iehnoh ïa ka Congress ka la long da ka jingsngewthuh bad da ka jingthmu da kaba bynrap, “Nga la shim ïa rai kaba khlaiñ bha da ka jingsngewthuh, kam dei ba nga la shu kynthih shabar khlem da pyrkhat ïa kaei ba nga leh, khlem da don ka rukom pyrkhat ïa ka lawei.”
U la pynpaw ïa ka jingaiti ïa ki kam pynroi ka Meghalaya kaba ong, “Khlem pep nga la don ka jingthoh jong ki lynti kiba la dep ban thoh na ka bynta ka jylla Meghalaya bad kum uwei na ki dkhot uba la ïoh ka lad ban shakri ïa ka jylla ha ka ban kyntiew ïa ka jylla haryngkat lang bad kiwei pat ki nongïalam ka jylla.”
U Mukul u la banjur ïa ka jingïada ïa ka bha ka miat jong ka jylla da ka jingkitkhlieh kaba lumlang bad ka donkam ban pynïar ïa ki lynti ïaid.
Shuh shuh, u nongïalam ka liang pyrshah u la banjur ba ka kam jingim paidbah bad ka longïing kaba long marwei.
“Ka longïing longsem ka neh hi ka ïing ka sem, hynrei nga kwah ban ïathuh ïaphi kawei ka kam shisien ba la nga la rai ban don ha ka jingim paidbah, ngam lah ban don marwei tang hapoh ka ïing ka sem jong nga marwei,” ong u Mukul.
Haba ïadei bad ka rai jong u Zenith, u Mukul u la ong, “U lah ban pyrkhat ba ki jingkwah jong u kin lah ban urlong lada u kynriah, hynrei u lah ruh ban bkla. Ïa kane ngan sa khi ïa ka”.
