Mairang, Rymphang 06: : Ha kane kajuh ka sngi u kyrtong jong ka Congress, u Bah Batskhem Ryntathiang, uba long ruh u MDC ka Mairang, u la wan thep kyrteng ryngkat ka jingsynran lang ki nongïalam ka Party bad kiba haïing hasem bad ki nongkyrshan ka Party.
U Bah Batskhem u la ong ba ha kine ki saw snem ba u long kum u MDC u la pyndep hok la kamram kum u nongmihkhmat la ka long ha ka roi par ne kano kano ka kam kaba la bynshet ha u. Hynrei ki don pat ki por ba kum u briew um lah ban pyndep katkum ka jingangnud ki paidbah, namar ba ka skhim MDC kadei kaba rit.
U la ong ruh ba ka jingkyrshan kaba u la ïoh haba u la jop kum u MDC ka ai jingkyrmen ïa u haba ki paidbah babun ki la pynjop donburom ïa u.
U Bah Batskhem u la kyntait ruh ïa ki khana ba u ïoh jingkyrshan na kiwei pat ki Seng, namar haduh mynta kaba kyrshan ïa u dei beit tang ka Seng Congress. Hynrei u la ong ba kum ki paralok nongmihkhmat ha District Council pat u don ka jingïadei kaba jan bad kiwei pat ki para nongmihkhmat.
