“Nga la aiti lut ngam don jingbabe shuh” ong u samla pule ba wan ba nyngkong ha ka Top 20

Shillong, Iaiong 7 : U samla pule u Wangaal Lama jong ka Gorkha Pathshala Higher Secondary School, uba ïoh ïa ka kyrdan ba nyngkong ha ka Top 20 list jong ka eksamin Secondary School Leaving Certificate (SSLC), ula pynpaw ka jingsngewnguh da kaba ong “Ka result kam da sngewpher ïa nga namar kaei kaba nga la leh, nga la aiti lut naduh ka mynsiem. Ngam don jingbabe shuh”.
U Lama ula ïathuh ïa ka jingsngew kyndit bad jingkmen haba ong “Haba nga ïoh ïa ka, nga sngew kum ha ka jingphohsiew, nga khuslai bha, ngam shym la peit wat ïa ka result”.
Ula pynkynmaw ba ynda poi ha skul ula ïohi ïa ka jingkhynwin da kaba ong “Ynda ki la iathuh ïa nga halor ka result jong nga, ngam lah satia ban ngeit. Nga la kmen palat”.
Halor kane ka jingjop, u Lama ula ban jur ïa ka jingngeit halade bad ka jingtrei shitom.
“Phim dei ban don ka jingsngew ba phi kham poh ban ïa kiwei kaba nyngkong eh ka long ba phi dei ban don ka jingngeit halade” ula ai jingmut.
U Lama ula kyntu ïa ki paralok ban long trai ïa la ka sap bad don ïa ka jingshemphang ha ka jingim. “Wat long ki ñiang bam kot, phi dei ban don ïa ka jingshemphang ha ka jingim. Dei ban don ia ki jingtip kaba jylliew halor ki mat bapher bapher bad haba phi thoh, thoh naduh ka dohnud jong phi” ula ong.
Halor ka lawei ka bym pat shim rai, u Lama ula ong “U Blei un sa ïarap ïa nga ban shem ïa ka jingthmu jong nga ha ka jingim. Wat pyrkhat ïa nga kum u topper.Nga shu pule. Nga tip ba da ki hajar ngut ki khmih lynti ïa kane hynrei donbok nga wan hakhlieh duh”.
u la ong ba kum ki khynnah pule dei ban pule bha baroh kawei ka kot bad ban lok paralok ba ïajan bha bad ki kot pule nangta ban shah shkor bha ïa ki nonghikai bad ka internet pat ka wan hadien haba don kino kino ki jingsngew artatien.
Haba kren bad ki nongthoh khubor u la pynpaw shuh shuh ïa ka jingkmen kaba khraw ban kynjoh sha ka thong kaba um poi pyrkhat bad u la ai nguh ïa U Blei, nangta ïa ki kmie ki kpa kiba la kyrshan ïa u naduh ba sdang, ïa ki nonghikai bad kumjuh ruh ïa ka skul baroh kawei.
U la pynpaw ka jingsngewkmen ba u la wanrah ka jingsarong ïa ki kmie ki kpa, ïa ki nonghikai bad ban kyntiew ruh ïa ka burom jong ka skul.
Halor ka social media u la ong ba lada pyndonkam hok lah ban ïoh ki jingïarap babun hynrei lada pyndonkam bakla kan long pynban kum ka bih.
Katba u samla Aditya Thapa uba wan ha ka kyrdan kaba 7 bad u Sharat Chetri uba wan ha ka kyrdan kaba 8 na kane ka juh ka skul ki la ong ba ki don ka thong ban nang pule khambha shakhmat khnang ba kin lah ban pynurlong ïa la ki jong ki jong ki jingthmu.
Haba phai pat sha ki bynta kiba kum ki khynnah skul kiba la poi sha ka kyrdan kaba ym shym la poi pyrkhat naba ki hap ban ïakhun bad kiwei pat ki skul kiba la ju paw manla ka snem kiba don ha nongbah Shillong ki la ong, “Ngi la ju ïohi ba manla u snem ba kiwei ki skul ha Nongbah Shillong ki paw bad wan shakhmat bad dei halor kine ba ngi la pynkhreh ruh ïalade ban ïakhun bad kine ki skul bad mynta u snem ngi la lah ban ïoh ïa u soh ban pynpaw ïa ka skul la jong ha kane ka sien kaba nyngkong,” ong kitei ki khynnah skul.
Haba kylli ïa ki thong ba ki buh hakhmat hadien habud ban pynkhreh lypa ïa ki jingim jong ki, kine ki khynnah skul ki la ïathuh ba ki don ki jingangnud ban kyntiew ïa ka jylla, ban pynkhreh ruh ïa ki eksam Civil Service ban rah nam ïa ka jylla, nangta don kiba don ka thong ban shna phlim, ka kam shet jingshet bad kiwei kiwei ki thong.