Shillong, Nailur, 26: U MP ka Rajya Sabha u Dr. WR Kharlukhi ha ka sngi Palei u la dawa ban thung ïa ka jingtohkit ba laitluid halor ka jingkynnoh ba ka don ka jingleh sop sop hapoh ka Meghalaya Public Service Commission (MPSC).
U Dr. Kharlukhi u la ong ba u long uba kloi ban resaiñ kum u MP lada lap ba ka kurim jong u ka donkti.
Ha ka shithi ba la phah sha u Myntri Rangbah ka Jylla u Conrad K. Sangma u Dr. Kharlukhi u la ong, “nga kwah ban pyntip sha phi ba ha kine ki khyndiat sngi, ka la mih ha ki khubor shaphang ki jingbym ïaid beit hapoh ka Meghalaya Public Service Commission. Ka Kong Corina Lyngdoh kaba dei kawei na ki dkhot ha ka Commission ka dei ka kurim jong nga bad nga sngew ba kane ka la pynsniew dur ïa ka ïing ka sem jong nga. Kumta ban pynbeit ïa kane nga kyrpad ïa ka Sorkar ban thung da ka jingtohkit kaba laitluid halor kane ka mat.”
U la kyrpad ruh ba dei ban pyndep ïa ka jingtohkit hapoh shi bnai.
Ha ka jingïakren bad ki lad pathai khubor u Dr. Kharlukhi u la ong, “ma nga bad ka kurim jong nga ngi la ïakren (halor kane) bad ka la ong lada ki lap eiei ba nga la leh (ïa kaba bakla) nga kloi ban leit shong along. Kumjuuh ruh, lada ka jingtohkit ba laitluid ka lap ba ka kurim jong nga ka donkti lang, ha ka sngi kaba bud ngan resaiñ shi syndon kum u MP khnang ba kin tip ba nga dei u briew uba kumno.”
U la ong ba ka jingdawa ban thung ïa ka jingtohkit ka long ban pynthikna ba kiei kiei baroh ki dei ban long katkum ka jingshisha hynrei ym ban shu pynshong nongrim na ki khubor hamsaïa.
“Ka don ka rai jong ka Supreme Court ha kaba 87.5% la thoh bad 12.5% ka dei kaba shimet bad ym tang katta, balei kane ka rai ka wan? Ka wan namar ba ki la don ki jingbym ïaid beit ha ka Assam Public Service Commission (APSC) bad ha ka jingtohkit ki katto katne ki tnad treikam, la lap ba ka long kaba shisha bad haduh kine ki sngi u Chairman jong ka APSC u don shah set ha phatok,” la ong u Dr. Kharlukhi.
“Kumta yn ym don kano kano ka Commission ha baroh kawei ka ri India ka ban nud ban ieng pyrshah ïa kane ka rai jong ka Iingbishar Supreme Court,” u la ong. U la kyntu ruh ïa ki nongthoh khubor ba kin wad bniah ïa ki jingshisha ym tang ban shu pynmih ïa ki khubor tang ba la ïoh sngew na ki saw lyer.
U Dr. Kharlukhi u la ong ba ki briew kiba kynnoh ïa ki kam bamsap bad bunsien ka jingkynnoh ki kdew kti ïa ka NPP. “Hynrei nga shem ba kane ka jia tang ha ka saiñpyrthei. Lada phi shlur (wad ïa ka jingshisha),” u la ong.
U la ai nuksa ruh ïa ka mukotduma ba dang shen kaba ïadei bad ka jingkynnoh jong u President ka seng Congress u Bah Vincent H. Pala pyrshah ïa u Symbud Myntri Rangbah ka jylla u Bah Sniawbhalang Dhar, uba la phah da ka Legal Notice kaba T.100 klur. “Peit kaei kaba u Bah Pala u la leh? U la kren halor u drok bad wanrah ïa ka kyrteng jong u Symbud Myntri Rangbah. Haoid, lada u (Pala) bakla un kylla duk da ka 100 klur hynrei lada ka jingkynnoh ka long kaba dei u Symbud Myntri Rangbah un hap ha phatok. Ka dei ban long kumne. Wat shu kren kyllum. Phi lah ban wad bniah bad ban kdew,” u la ong.
