Nga khlem ïoh pdiang shithi, u samla Eugene un long u kyrtong ka UDP na Mawphlang : Metbah

Shillong, Nailur 9 : U President ka UDP u bah Metbah Lyngdoh ula kren shai ba u khlem ïoh pdiang satia kano kano ruh ka shithi na u bah Eugeneson Lyngdoh kumba la paw ha ki kot khubor ba un ym ïaleh shuh ia ka election bad u pynthikna ruh ba u bah Eugene un long beit u kyrtong jongka UDP na ka Mawphlang Constituency ha 2023.
“ Nga kyndit ban ïohi ba kum kine ki jingthoh ki mih ha ka kot khubor namar nga khlem ïoh kano kano ruh ka shithi kumba la kynnoh bad kane baroh ka dei ka jingthoh kaba khlem nongrim bad ka bym shisha. Namar u bah Eugene um ju pynpaw hi ruh ba un ym ïaleh shuh ïa ka election ha nga bad un long beit u kyrtong jongka UDP na Mawphlang ha u 2023 namar kumba ki paidbah ki la shaniah ïa u hadien ka jingkhlad noh jong u kpa u bah S.K Sun ba un mih bujli ban shakri ia ki da kaba ki la pynjop don burom ia u ha ka election shiteng samoi kumta ruh ki paidbah ki dang kwah ba un dang ïai bteng ïa kane ka kam ban pyndep ïa ki kam kiba u kpa u la dep prat lynti” ong u bah Metbah.
Kane ka khubor ka dei kaba la shu ïalam bakla ïa ki paidbah namar haka jingshisha shwa ban pynmih ïa kum kine ki khubor la dei ban pynthikna shwa na u kum u President ne wat na u trai u bah Eugeneson hi ruh ym dei ban shu thoh tang haba ïoh sngew ïa ka khubor hamsaia kaba ktah pat ïa ka burom bad iktiar jong u bah Eugeneson bad ka party UDP hi baroh kawei, Pynkut u President.
U Bah Eugene u la jop ïa ka elekshon shiteng samoi kaba la long ha u Naiwieng jong u snem baladep, ba la pynlong hadien ka jingkhlad u Bah Sun.