Shillong, Nohprah, 08: U Bah Rocky Hek, kyrtong ka National People’s Party sha ka elekshon nongmihkhmat sha ka Iing Dorbar Thawaiñ ka Jylla Meghalaya ha u snem 2023 ban wan na Pynthorumkhrah Constituency u la ong ma u hi u shim beit ba u Bah AL Hek, MLA ba mynta katei ka Constituency, u dei hi u kñi watla u ladep ong ba u Bah Rocky um dei u pyrsa kur trai jong u.
U la ong ka dei beit tang ka kam saiñ-hima bad kam don kano kano ka jingïakynad ha ïing ha sem bad ka jingpynkhreh ïakhun jong u ïa ka elekshon ka dei na ka bynta ka Constituency bad ka jingkren u Bah AL Hek ka long ka jingkren sngew shimet jong u.
Halor ka jingïakhun elekshon pyrshah ïa u Bah AL Hek, uba la jop ruh 5 sien kum u MLA na kane ka Constituency bad ïa u Bah Pynshngain N Syiem, MDC ka Mawkhar-Pynthorumkhrah, u Bah Rocky u la ong ba kam dei kaba suk hynrei u trei shitom ban ïoh ka jingkyrshan na ki nongshong shnong bad um don ka jingartatien namar u dei u trai shnong.
U la ong ba ha ka Constituency hi bun ki kam ban kyntiew ïa ka roi ka par kim pat biang kum ka surok ka lynti syngkien, ka um bam, ka bor ding elektrik bad kiwei pat. U la ong ba shisien ba long MLA ka skhim ka ïaid ryngkat ryngkat ym shuh ban shu pynthyngngñian ïa ki paidbah da ka pisa 500 ne 1000 tyngka.
U la ong ba ha ka jingpynkhreh jong u ïa ka elekshon na ka NPP ki don ki jingkynthoh hynrei bunsien ïa u dieng uba seisoh bunsien ki sngewtynnad ban kawang maw bad ka Sorkar MDA ha ka jingïalam ka NPP ka la ïarap shibun ïa ki paidbah nongshong shnong ka Jylla.
Da kaba ong ba ka jingdon jong u ha ka NPP ka la long ka lynti ban ïoh ïakren bad ki bor bahalor ka Party bad ka Sorkar halor ki jingud jingnam ki paidbah ka Constituency kum ka jingsniew ka surok hajan ka BDW International School, u la ong ba mynta la ïoh mang tyngka kumba 3 klur 84 lak 30 hajar tyngka ban shna pynbha ïa kane ka surok.
