Shillong, Naitung, 20: Ka Kong Bibi Jyrwa, kawei na ki nongshong die madan ha Khyndai Lad ka la kam ba ka don ïa ki sakhi sabut da ka video ban pynshisha ba ki don ki briew kiba khrong pisa beaiñ ha ka dor kaba T. 700 haduh T.1000 shi sngi na ki nongdie madan kiba shim wai pateng na ki para nongdie madan tang ban ïoh shong die jingdie ha Khyndai Lad.
Ha ka jingïakren bad u nongthoh khubor, ka Kong Jyrwa ka la ong, “ki pan sakhi na nga, mynno ngi siew shi hajar shi sngi (hynrei) nga don ka sakhi, ngan pyni ïa ka sakhi mynta namarba nga don ïa ka video. Nga ngam tip, ki bar jylla ki kylla ktien, hakhmat jong ki kin kren da kumwei, shawei kin kren da kumwei,” la ong ka Kong Jyrwa.
“Hynnin nga la telephone hakhmat kawei ka lad pathai khubor, uto u briew u phla hok ba u siew shi hajar ka bai wai sha ka Deng kaba shong dukan ha iew. Ka briew kaba shong dukan ha iew ka wan tuklar leh aiu shane sha Khyndai Lad. Kam dei hok ban wan tuklar ban khrong bai wai shi hajar shi sngi,” la kynnoh ka Kong Jyrwa.
“Kumba ki pharep ïa nga ba nga leit knieh ïa ka jaka jong ka Shwa ba nga tim da ka sih da ka sang ma ki ruh ki dei ban ai da ka sakhi ïa nga ym da ka ktien lamler. Ki dei ban ai kumba ai ma nga ka sakhi (haba pyni sakhi ruh ïa ka video). Kane ka dei ka sakhi ba kito ki Association ki pharep ïa nga ba nga shu lamler tang ka shyntur. Ngam lamler nga don da ka sakhi, khlem ka sakhi ngam kren,” ka la ong.
“Lada ki dang kwah shuh ïa ki sakhi sabut nga dang don shuh shuh. Ki bun ki sakhi, ngan sa mih biang ha ki lad pathai khubor ha ka Lah Sngi u Blei ngan pyni lut ïa ki sakhi sabut baroh ïa ki paidbah. Ka Deng ka dei ka briew jong ka Association ka shim pisa shi shi hajar, ki tip lut tangba ki len, ki ïada. Ïa kiwei ki dang lah ban leit ujor, ki dei hok ban ujor bad kum ka Assocation ka dei ban peit ïa ka (kam die madan) tangba lada phi ujor ruh phim dei ban peit khmat shiliang. Phi dei ban ujor ruh wat ïa kito ki briew kiba aiwai ïa ka jaka hynrei balei pat phim ujor ïa kiba aiwai ïa ki jaka, phi la tip haba phi shong hangto baroh shi sngi, balei phim ujor ïa ki tang namarba ki dei ki briew lajong, ki briew ka Association,” la kynthoh shuh shuh ka Kong Jyrwa.
“Nga ngam tieng ïano ïano ruh,” ka la ong.
Haba kylli, ka la ong, “ki briew jong ka Association ki ong ba ngam dei briew kaba wan bylla shong madan ha Khyndai Lad hynrei baroh ki briew ki tip ba nga wan bylla hangne. Nga kamai shi piah shi tyngka nangne. Nga ngam don jaka haba ki la shong lut ki briew, nga hap shu wai ïa ka jaka. Kato ka jaka jong ka Shwa ruh nga la wai shi snem tam (ha ka dor) 700 shi sngi.”
Ka Kong Bibi ka la ong ruh ba ka long kaba kloi ban aiti ïa ki sakhi sabut lada don ka jingtohkit na ka liang ka Sorkar.
“Lada don ka jingtohkit kaba hok, ngan ai lut kaei kaba don ha ka kti,” ka la ong.
