Shillong, Risaw 03: Ka jinghap slap kaba bteng lynter baroh shisngi ha ka Sngi Palei (03 tarik, Risaw 2024) ka la pynlong ïa ka jingïalehkai semifinal jong ka lympung 1st Senior Women’s Interstate Friendship T20 Tournament ban hap sangeh bad kynriah ha kawei pat ka sngi, kata mynta ka Sngi Thohdieng.
Kane ka lympung la pynlong da ka North East Cricket Development Council bad la pynïaid da ka Meghalaya Cricket Association ha Pahamsning Cricket Ground ha Ri-Bhoi.
Ka jingïakhun kaba lyngkot ka la ailad ban pyndep katto katne ki over jong ka jingïakhun kaba nyngkong ha katei ka step hapdeng ka Meghalaya bad ka Nagaland hynrei ym la lah satia ban pyndep pura ïa kane ka jingïakhun lane ban sdang ïa ka jingïalehkai kaba ar hapdeng ka Sikkim pyrshah ïa ka Manipur.
Kumta, na ka liang jong ka Tournament Committee ka la shim ïa ka rai ban kynriah noh ïa ki jingïalehkai semi final bad ban pynlong ïa ka mynta ka sngi, ha kaba ka Meghalaya kan ïakhun ïa ka Nagaland ha ka por 9 baje mynstep, nangta ka Sikkim pyrshah ïa ka Manipur ha ka por12 shiteng mynsngi.
Lada jia ba ym lah ban ïoh ïa ka resol mynta ka sngi, yn pyntreikam ïa ka kyndon No. 14 jong ka jingïalehkai ban ïoh ïa ka resol – ha ka sien kaba nyngkong yn pyndonkam da ka super over. Lada ym lah ban pynlong ïa ka super over, yn pyndonkam da ka “bowl out” bad lada kane ruh kam lah ïa ka resol yn rai da kaba kynting pisa (coin toss).
Ka final la buh ban pyndep ha ka Sngi Saitjaiñ bad ym don sngi ba la buh kyrpang na ka bynta kane.
